ABŞ dövlət katibi Marko Rubio İran neftinə və nefti daşıdığı iddia edilən gəmilərə qarşı yeni sanksiyalar tətbiq etdiklərini açıqlayıb: "Bu gün Dövlət Departamenti İranın neft və neft-kimya məhsullarının ticarəti ilə məşğul olan yeddi quruma sanksiya tətbiq edir və iki gəmini bloklanmış aktivlər kimi təyin edir. Prezident maksimum təzyiq kampaniyası çərçivəsində İrandan Çinə ixrac da daxil olmaqla, qeyri-qanuni neft və neft-kimya ixracının sayını sıfıra endirməkdə qərarlıdır”.
***
Rubio həmçinin bildirib ki, İran neftini daşıdığı iddia edilən iki şirkət və bu şirkətlərlə əlaqəli iki gəmiyə qarşı sanksiyalar tətbiq edilib.
Maraqlıdır ki, yeni sanksiyalar ABŞ və İran arasında Tehranın nüvə proqramını məhdudlaşdırması müqabilində sanksiyaları yumşaltmaq məqsədi daşıyan danışıqlar fonunda qəbul edilib. İran və ABŞ arasında dolayı danışıqların üçüncü raundu aprelin 26-da Omanda İranın xarici işlər naziri Abbas Araqçı və ABŞ prezidentinin xüsusi nümayəndəsi Stiv Vitkoff, eləcə də onların başçılıq etdiyi heyətlərin iştirakı ilə keçirilib.
Danışıqlardan sonra Araqçı danışıqların gedişindən məmnun olduğunu, lakin İranın nüvə proqramı ilə bağlı razılaşmanın detalları və ümumi prinsipləri ilə bağlı fikir ayrılıqlarının hələ də qaldığını bildirib. Oman Xarici İşlər Nazirliyi növbəti görüşün mayın 3-də keçiriləcəyini açıqlayıb. İran tərəfi qeyd edib ki, görüşün yeri və vaxtı Oman hakimiyyəti tərəfindən müəyyən ediləcək. ABŞ-ın “Axios” xəbər portalı dördüncü turun mayın 3-də Romada keçirilə biləcəyini yazıb.
çap et