Livan ordusu İsrail sərhədi boyunca “Hizbullah” infrastrukturunun ən azı 90 faizinin məhv olduğunu bildirib.Adının açıqlanmasını istəmədən AFP-yə danışan Livan təhlükəsizlik rəsmisi ordunun atəşkəs çərçivəsində Hizbullahın yeraltı bunkerlərini və qərargahlarını ələ keçirdiyini bildirib.
Mənbə əlavə edib ki, düşərgələrdəki sursatların çox hissəsi ya İsrailin bombardmanları nəticəsində zədələnib, ya da “o qədər pis vəziyyətdədir ki, onu yığmaq mümkün deyil” və buna görə də Livan ordusu onu məhv edib.
Bildirilib ki, əsgərlər Litani çayının şimalından cənuba silah ötürülməsinin qarşısını almaq üçün keçid məntəqələrində də təhlükəsizlik tədbirlərini gücləndiriblər.
Rəsmi bildirib ki, razılaşmaya əsasən Livanın cənubundan çəkilməli olan “Hizbullah” ordu ilə əməkdaşlıq edir: ““Hizbullah” bölgədən geri çəkilərək “nə istəyirsən et” dedi. Litaninin cənubunda “Hizbullah”ın heç bir hərbi infrastrukturu qalmayıb”.
Livan prezidenti Cozef Aun dünən bildirib ki, onlar razılaşmanın üzərinə düşən hissəni yerinə yetiriblər.
Aun “Sky News Arabia” telekanalına verdiyi müsahibədə cənub bölgələrinin 85 faizinin Livan ordusunun nəzarətində olduğunu bildirib.
“Hizbullah” lideri Həsən Nəsrullah sentyabrın 27-də Beyrutda İsrail ordusunun hücumu nəticəsində öldürülüb. Onun yerinə gələn Naim Kasım martın 29-da verdiyi açıqlamada atəşkəs və tərksilahla bağlı diplomatik kanalları açıq saxladıqlarını, lakin İsrailin razılaşmaya əməl etmədiyi təqdirdə “başqa variantlardan” istifadə edilə biləcəyini bildirib.
Livan Səhiyyə Nazirliyinin məlumatına görə, 2023-cü il oktyabrın 8-dən bəri İsrailin hücumları nəticəsində 4000-dən çox insan ölüb, 17 minə yaxın insan yaralanıb.
çap et