ABŞ Konqo Demokratik Respublikası (DRC) və Ruandaya sülh və mədən sazişləri üçün təzyiq edir. ABŞ prezidenti Donald Trampın Yaxın Şərq üzrə müşaviri Massad Boulos “Reuters” agentliyinə verdiyi müsahibədə Qərb ölkələrinin regiona milyardlarla dollarlıq sərmayə qoymasına imkan verəcək bir razılaşma istədiklərini bildirib.Boulos deyir ki, onlar DRC və Ruandanın iki ay ərzində Ağ Evdə müqavilə imzalamasını hədəfləyirlər.
DRC-də 23 Mart Hərəkatı (M23) adlı üsyançı qrup orduya qarşı mübarizəni davam etdirir. Ruanda tərəfindən idarə olunduğu iddia edilən qrup iki böyük şəhərə, Qoma və Bukavuya, eləcə də minerallarla zəngin digər bölgələrə nəzarət edir. M23 yaraqlılarının əksəriyyəti Ruanda prezidenti Pol Kaqamenin qəbiləsi olan Tutsilərdir.
Boulos deyir ki, onlar hər iki ölkənin təhlükəsizlik problemlərini həll etmək üçün addımlar atmasını istəyirlər. Bu kontekstdə Ruandadan qoşunlarını Konqodan çıxarması və M23-ə dəstəyini dayandırması tələb olunur. DRC-dən Ruanda hökumətinə qarşı mübarizə aparan Ruandanın Azadlıq Demokratik Qüvvələrinə (FDLR) dəstəyi kəsməsi də xahiş olunur.
Trampın müşaviri əlavə edib ki, irəliləyişin olub-olmadığını müəyyən etmək üçün ABŞ, Qətər, Fransa və Toqonun da daxil olduğu bir komitə yaradılıb.
Boulos, DRC və Ruandanın sülh təkliflərinin qiymətləndiriləcəyini və tərəflər arasında razılaşma əldə edildikdə mədən müqavilələrinin imzalanacağını bildirir: “Sülh müqaviləsini imzaladığımız zaman DRC ilə mədən müqaviləsi də həmin gün başa çatacaq. Daha sonra Ruanda ilə fərqli miqyasda mədən müqaviləsi imzalanacaq”.
Londonda yerləşən “The Financial Times”, mart ayında Tramp administrasiyasının mədən müqaviləsi üçün DRC lideri Feliks Çisekedi ilə görüşdüyünü bildirib. Qəzet qeyd edib ki, ABŞ DRC-yə dəstək müqabilində mis, kobalt və uran kimi nadir minerallara çıxış əldə etmək istəyir.
Tramp administrasiyası uzun sürən danışıqlardan sonra aprelin 30-da Ukrayna ilə oxşar saziş imzalayıb. Razılaşmaya əsasən, ABŞ bu günə qədər verdiyi hərbi və maliyyə dəstəyi müqabilində Ukraynanın nadir torpaq elementlərinə və təbii ehtiyatlarına çıxış əldə edəcək.
çap et