Rusiya Prezidenti Vladimir Putin bir tərəfdən 9 mayda faşizm üzərində qələbənin 80 illiyinə hazırlaşır, təntənəli parada hazırlıq işlərinə rəhbərlik edir, o bir tərəfdən faşist Almaniyasına qarşı qələbədə ruslar və digər millətlərlə çiyin-çiyinə savaşan ukraynalıları bombalamaq əmri verib.
Faşist Almaniyası Böyük Vətən müharibəsinin ilk ilində Ukraynanı işğal edir və ukraynalıları qətlə yetirirdi, üstündən 80 il keçdikdən sonra Rusiya da eynisini edir. Kreml sahibi yenidən “Oreşnik” ballistik raketləri ilə Kiyevin müxtəlif mərkəzlərinə zərbə endirməyi əmr edib. Bu yeni dağıntılar və növbəti qətllər deməkdir. Bunun fonunda Moskvada parad keçirmək məntiqə ziddir.
***
Paytaxt Moskva başda olmaqla Rusiyanın hava limanlarında xaosdur, Ukraynanın kütləvi dron hücumlarına görə, təyyarələr havaya qalxa bilmir, hava limanına enənlərin sərnişinləri isə saatlarla təyyarəni tərk edə bilmir, insanlar təyyarələrdə havasızlıqdan və yaranan anti-sanitariya şəraiti barədə görüntülər yayırlar. Bu Ukrayna Prezidenti Vladimir Zelenskinin bir neçə gün əvvəl “9 may paradına qatılan qonaqların təhlükəsizliyinə zəmanət verə bilmərik” açıqlamasının praktik yerinə yetirilməsidir. Həqiqətən belə şəraitdə 9 may paradına qatılmaq istəyən müxtəlif dövlətlərin liderlərinin təhlükəsizliyi ön plana çıxır. Rusiya yüksək səviyyəli qonaqlara təhlükəsizlik təminatı vermək iqtidarındadırmı? Azərbaycanın sərnişin təyyarəsinin dekabr ayında raketlə vurulması olayından çıxış edərək Rusiya səmasının təhlükəsiz olmadığı, üstəgəl dronlarla sərnişin təyyarələrinə fərq qoya bilmədikləri aşkardır. Rusiya Prezidenti Vladimir Putin Kiyevə elə ona görə 3 günlük atəşkəs təklif edirdi ki, 9 may paradını rahat keçirsin. Vladimir Zelenski isə işğalçı dövlətin liderinə rahatlıq vermək istəmir. Başqa cür ola da bilməz. Rusiya müharibə aparan ölkə olduğundan Ukraynanın əks-həmlələrinə məruz qalır.
çap et