Güney Azərbaycanın Ərdəbil vilayətində dövlət idarələri İranın enerjiyə qənaət siyasəti səbəbindən cümə axşamı günləri bağlı olacaq.İranın rəsmi xəbər agentliyi İRNA-nın məlumatına görə, məsələ ilə bağlı Ərdəbil valiliyinin İctimaiyyətlə Əlaqələr Şöbəsindən yazılı açıqlama verilib.
Açıqlamada, “Enerji İstehlakının İdarə Edilməsi İşçi Qrupunun və valiliyin qərarına uyğun olaraq, ölkənin enerji sabitliyinə töhfə vermək məqsədi ilə, təcili yardım və xidmət müəssisələri istisna olmaqla, bütün əyalət inzibati qurumları, 8 May tarixindən etibarən növbəti xəbərdarlığa qədər cümə axşamı günləri bağlanacaq”, – deyilir.
Açıqlamada, Ərdəbildəki inzibati qurumların idarəçilərindən həftə ərzində lazımi planlaşdırma və insanların işlərinin öhdəsindən gəlmələrinin istənildiyi, ölkədə həftəlik tətilin ilk günü olan cümə axşamı günü xidmətə xələl gətirməyəcək şəkildə uzaqdan işə başlanılmasının vacibliyi qeyd edilib.
Bankların cümə axşamı açıq olacağı vilayətdə müvafiq qurumların göstərişlərinə uyğun olaraq məhkəmə bölmələrinin fəaliyyəti müəyyən ediləcək.
İranda cümə axşamı və cümə günləri həftə sonlarıdır, lakin bir çox inzibati qurumlar cümə axşamı günləri də öz işini davam etdirirlər.
Ölkənin enerji sabitliyinə töhfə vermək üçün Kirman vilayətində də cümə axşamı günləri istirahət günü elan edilib.
İranda enerji istehlakını idarə etmək üçün gün işığından daha çox istifadə etmək üçün mayın 10-u şənbə günündən etibarən iş saatı 06:00-dan 13:00-a kimi elan edilib.
Dünyanın ən böyük təbii qaz və neft ehtiyatlarına malik ölkələrdən biri olan İran son aylarda iqtisadi sanksiyaların ağır təzyiqi, infrastruktur investisiyalarının qeyri-kafi olması və enerji tələbatının sürətlə artması səbəbindən ciddi enerji böhranı yaşayır.
Son aylarda ölkədə enerjiyə qənaət təcrübələri getdikcə geniş yayılıb. Xüsusilə isti havalarda kondisionerlərin işə salınması səbəbindən enerji tələbatı pik həddə çatdığı üçün səlahiyyətlilər tez-tez əhalini resurslardan daha qənaətlə istifadə etməyə çağırırlar.
çap et