Bütün dövlət telekom operatorlarını özünə birləşdirən “Aztelekom” vahid milli telekom operator olaraq fəaliyyətə başladı.Azərbaycanda telefon rabitəsi 1881-ci ildə “Nobel qardaşları cəmiyyəti” tərəfindən ilk telefon xəttinin çəkilməsi ilə yaradılıb.
1886-cı ildən isə artıq indiki “Baktelecom”un bünövrəsi hesab olunan Bakı Şəhər Telefon Stansiyası fəaliyyətə başlayıb.
Sonralar bu qurum müxtəlif adlarda, gah dövlət, gah da özəl olaraq fəaliyyət göstərib.
Bu qurum müxtəlif zamanlarda Bakı Şəhər Telefon Stansiyası, Bakı Şəhər Telefon Şəbəkəsi, “Bakı Telefon Rabitəsi” İstehsalat Birliyi (BTRİB), “Bakı Telefon Rabitəsi” MMC, “Baktelecom” olaraq adlanıb.
2017-ci ildə BTRİB yenidən təşkil olunaraq “Bakı Telefon Rabitəsi” MMC (Baktelecom) olaraq fəaliyyət göstərib.
Son zamanlar isə “Baktelecom” olaraq AZCON nəzdində fəaliyyət göstərirdi.
“Baktelecom” nəhəng qurum olub.
“Aztelekom” isə məhz bu qurumdan, o zaman Bakı Şəhər Telefon Stansiyası adlanan qurumun parçalanması ilə yaradılıb.
Daha dəqiq desək, 1933-cü ildə Bakı Şəhər Telefon Stansiyası Bakı şəhərində və regionlarda telekommunikasiya fəaliyyətinə cavabdeh olan iki quruma ayrılıb.
İndiki “Aztelekom”un ilk bünövrəsini təşkil edən Bakı Şəhərlərarası Telefon Stansiyası məhz bu ildə yaradılıb və Azərbaycanın rayonlarında telekommunikasiyanın fəaliyyətinə cavabdeh qurum olaraq fəaliyyətə başlayıb .
Sonralar “Bakı Şəhərlərarası Telefon Rabitəsi” İstehsalat Birliyi olaraq fəaliyyət göstərib.
1992-ci ilin avqust ayında isə “Bakı Şəhərlərarası Telefon Rabitəsi” İstehsalat Birliyi əsasında indiki “Aztelekom” İstehsalat Birliyi yaradılıb.
“Aztelekom” İstehsalat Birliyi isə 2015-ci ildə “Aztelekom” MMC-yə çevrilib.
Beləliklə, 2025-ci ilin 16 may tarixində “Aztelekom” nəinki vaxtilə ayrıldığı qurum olan “Baktelecom”u, eləcə də dövlət sektorunda sektorda mövcud olan bütün telekommunikasiya qurumlarını özünə birləşdirməklə “Aztelekom” olaraq yenidən fəaliyyətə başlamış oldu.
Hazırda “Aztelekom”un təsisçisi AZCON hesab olunur.
Xatırladıram ki, uzun illər Antiinhisar Aztelekom və “Baktelecom”un birləşməsinə antiinhisar qanunvericiliyin tələblərinin pozulması baxımından icazə verməyib.
Bununla bağlı bir neçə illər davam edən məhkəmə çəkişmələri olub.
İndi isə görünən odur ki, RİNN-in apardığı siyasət nəticəsində nəinki Baktelecom, həm də sektorda olan bütün telekom operatorlar və aidiyyəti qurumlar da “Aztelekom”a birləşdirildi.
Beləliklə də, 140 illik tarixi olan, 1880-ci illərdən fəaliyyətə başlayan, Bakı şəhərində telekommunikasiya və internet işlərinə cavabdeh olan “Baktelecom” 2025-ci ildə bir qurum olaraq ömrünü başa vurdu.
Artıq ölkədə dövlət sektorunda telekommunikasiya operatoru olaraq vahid bir qurum – “Aztelekom” fəaliyyət göstərəcək.
Əlbəttə, belə nəhəng təmərküzləşmədə müəyyən risklər gözlənilsə də, təbii inhisarçıların bir qurum olaraq birləşdirilməsi, inzibati proseslərin sadələşdirilməsi, dövlətə məxsus resurslardan effektiv istifadə, optimallaşma və qənaət baxımından atılan addımlar uğurlu hesab oluna bilər.
Xatırladıram ki, 2025-ci ildə uğurla yekunlaşmış, bütün ölkə üzrə internetə əlçatanlığı təmin etmiş “Onlayn Azərbaycan” meqalayihəsinin əsas operatoru da “Aztelekom” MMC-dir.
Hazırda “Aztelekom” yalnız internetdən hər ay 75 milyon manat gəlir əldə edir.
Yeri gəlmişkən, xatırladıram ki, keyfiyyətli internetə əlçatanlıq təmin edilsə də, hələ də ölkədə internet tariflərinin əlçatanlığı müəyyən təbəqələr, xüsusən regionlarda yaşayanlar və bizneslə məşğul olmayanlar üçün yetərli deyil.
“Aztelekom” hələ də internet qiymətlərində vətəndaşlar üçün tələbata uyğun seçim imkanlarını yaratmayıb.
Bildiyim qədər hazırda AZCON tərkibində fəaliyyət göstərən “Aztelekom”da əlçatan tariflərin hazırlanması istiqamətində işlər aparılır.
çap et