CNN-in ABŞ rəsmilərinə istinadən verdiyi məlumata görə, İsrail İranın nüvə obyektlərinə hücum etməyə hazırlaşır. Bu xəbər neft qiymətlərinin yüksəlməsinə səbəb oldu, normalda təhlükəsiz sığınacaq kimi qəbul edilən dollar ucuzlaşdı, Yapon yeni və İsveçrə frankı bahalaşdı.“Normal olaraq, geosiyasi risklər artdıqda, həm yen, həm də dolların alışı artır, çünki hər ikisi təhlükəsiz sığınacaq kimi görünür, lakin hazırda investorlar dollar satır və yalnız yen alır”, – “SBI” Likvidlik Bazarı araşdırma direktoru Marito Ueda deyib.
Ueda hücumun baş verib-verməyəcəyi ilə bağlı qeyri-müəyyənlik səbəbindən dolların bu qədər kəskin şəkildə satmağa davam edəcəyinin çətin olduğunu söyləyib, lakin əlavə edib ki, zəif dollar və güclü yen tendensiyası getdikcə aydınlaşır. İqtisadçı bu səhər 143,8 civarında olan dollar/yen məzənnəsinin 142 səviyyəsinə düşəcəyini gözləyir.
“Westpac Banking Corp.” Valyuta Strategiyasının rəhbəri Riçard Franuloviç də ABŞ dollarının “şübhəsiz təhlükəsiz ehtiyat aktivi kimi şöhrətini” itirdiyini bildirib: “Buna görə də, tsiklik geosiyasi gərginlik bundan sonra yen və İsveçrə frankı kimi alternativ valyutalara daha güclü təsir göstərəcək”.
Bu arada, “Morgan Stanley” strateqləri aşağı faiz dərəcələrinin və dolların mümkün zəifləməsinin Asiya və inkişaf etməkdə olan bazar səhmlərini dəstəkləyəcəyini proqnozlaşdırıblar. “Biz 2026-cı ilə qədər aşağı faiz dərəcələri və zəif dollardan artan dəstək alacağı gözlənilən Asiyada və inkişaf etməkdə olan bazarlarda daxili tələb və islahatlardan faydalanacaq sektorlara diqqət yetirməyi tövsiyə edirik”, –Conatan Qarner deyib. Strateq Yaponiyanın TOPIX birjasında 6 faiz, Asiya Sakit Okean regionunda 5 faiz və Yaponiyada səhmlər istisna olmaqla, 5 faiz artım potensialı gördüyünü deyib.
“Morgan Stanley”də ayrıca bir komanda da ABŞ səhmlərini və istiqrazlarını almağı, eyni zamanda dolları satmağı tövsiyə edib. Serena Tanq da daxil olmaqla strateqlər ABŞ səhmləri və dövlət istiqrazları ilə bağlı fikirlərini “artıq çəki” olaraq dəyişərək, “FED”in gələcək faiz endirimlərinin istiqrazları dəstəkləyəcəyini və korporativ mənfəəti artıracağını proqnozlaşdırdılar. Strateqlər “S&P 500” İndeksinin 2026-cı ilin ikinci rübündə 6500-ə çatacağını, 10 illik xəzinə istiqrazlarının gəlirliliyinin isə 3,45 faizə düşəcəyini proqnozlaşdırırlar. Strateq ABŞ faiz dərəcələri ilə əmsallarının artım templəri ilə yaxınlaşdıqca dolların zəifləyəcəyini proqnozlaşdırır.
çap et