İtaliya polisi Avropanın ən güclü mafiya təşkilatı kimi tanınan “Ndrangheta”ya qarşı irimiqyaslı əməliyyata başlayıb. 200 nəfər haqqında araşdırmalar aparılarkən, 97 şübhəli barəsində həbs qətimkan tədbiri seçilib.
Polis mafioz qruplaşmasının narkotik biznesinin izinə düşüb. Müəyyən edilib ki, kokain Cənubi Amerikadan İtaliyanın “Gioia Tauro” limanına gətirilib və rüşvətlə liman işçiləri vasitəsilə ölkəyə yayılıb.
Polisin verdiyi açıqlamaya görə, "Ndrangheta" kokaini əsasən Kolumbiya, Braziliya və Panamadan əldə edib və konteyner gəmiləri vasitəsilə ölkəyə keçirib.
Kalabriyadakı “Gioia Tauro” limanında işləyən bəzi məmurlar rüşvətlə satın alınıb və daşımalar paylama şəbəkəsi vasitəsilə bütün İtaliyaya yayıldı.
***
İstintaq çərçivəsində müəyyən edilib ki, qurum təkcə narkotik vasitələrlə deyil, həm də yerli bizneslərdən hədə-qorxu ilə pul yığmaq, dövlət tenderləri ilə bağlı məxfi məlumatlara çıxış əldə etmək və dövlət idarələrinə sızmaqla sistemli şəkildə güc əldə edib.
Ümumilikdə 97 nəfər saxlanılıb. Bu şəxslərdən 81-i həbs, 16-sı isə ev dustaqlığı ilə bağlı vəsatətlə üzləşib. Bildirilir ki, əvvəlki cinayətlərə görə hazırda həbsdə olan bəzi adlar da siyahıya salınıb.
Əməliyyat mərkəzi Kalabriya olmaqla Roma, Milan, Bolonya, Rimini, Verona və Turin kimi böyük şəhərlərdə eyni vaxtda həyata keçirilib.
***
“Ndrangheta” Avropada kokain ticarətində demək olar ki, tam hökmranlığı sayəsində İtaliyanın ən güclü və ən zəngin mafiyası kimi tanınır.
40-dan çox ölkədə fəaliyyət göstərən struktur Kalabriya bölgəsində həm siyasətə, həm də yerli cəmiyyətə təzyiq edərək “dövlət daxilində dövlət” kimi fəaliyyət göstərir.
çap et