Turist qayığına silahlı basqın

Qiymətli əşyaları qarət edilib, bank hesabları boşaldılıb

İspaniya vətəndaşı Elizabet de la Almudena “TikTok”da 4,5 dəqiqəlik video paylaşaraq kabusundan danışıb. Almudenanın verdiyi məlumata görə; ailəsi, 6 yaşlı qızı və digər turistlərin də olduğu 14 nəfərlik qrup Perunun İquitos şəhərindən bir günlük çay turuna çıxıb.

Turist qayığı Amazon çayında üzərkən dörd silahlı şəxs qayığa minərək nəzarəti ələ keçirib. Hücum edənlər qayığı meşənin dərinliyinə sürükləyib, sərnişinlərin bütün qiymətli əşyalarını qarət edib və qayığın mühərrikini qoparıblar.

Almudenanın sözlərinə görə, hücum edənlər sərnişinləri mobil bank proqramları vasitəsilə pul köçürməyə də məcbur ediblər.

De la Almudena həmin anlar haqqında “Bu, heç kimin yaşamasını istəmədiyim bir şey idi”, – deyib.

“Hər kəsdən mobil telefonunu yandırmağı xahiş etdilər. Bizə dedilər ki, öz hesablarına pul göndərək. Bunu etməsək, bizi meşədə qoyub gedəcəklərini dedilər”.

***

Quldurlar qayığın mühərrikini oğurlayıb meşədə gözdən itdikdən sonra turistlər qayıqdakı taxtalardan istifadə edərək əllə avar çəkməyə başlayıblar. Xoşbəxtlikdən onlar rastlaşdıqları başqa bir ailənin köməyi ilə təhlükəsiz əraziyə çata biliblər.

Hadisəyə görə məsuliyyət daşıyan “Canopy Tours Iquitos” şirkəti verdiyi açıqlamada hadisənin nəzarətdən çıxdığını bildirib: “Mayın 14-də baş vermiş bu hadisə tamamilə qeyri-adi və gözlənilməz idi. Biz dərhal səlahiyyətlilərə məlumat verdik, zərər çəkmiş qrupa dəstək verdik və istintaqda fəal iştirak edirik”.

Şirkət həmçinin açıqlamasında təhlükəsizlik tədbirlərini artıracaqlarını, qayıqlara GPS sistemləri quraşdıracaqlarını və polislə daha yaxından əməkdaşlıq edəcəklərini açıqlayıb.

Almudena, şirkətin heç bir GPS və ya fövqəladə tədbirinin olmadığını bildirdi və daha əvvəl bölgədə baş verən oxşar hadisələrə baxmayaraq heç bir təhlükəsizlik tədbirinin alınmadığını vurğuladı: “Bizi qorumalı olan insanlar bizi tamamilə məğlub etdilər”.