Qurultayın vaxtı dəyişdi

Tədbir keçirilməsi 1 ay geri çəkildi

«Media forum» saytının məlumatına görə, partiyanın mayın 13-də qəbul etdiyi bəyanatda bildirilir ki, bir neçə ildir hakimiyyət öz funksiyasını yerinə yetirmədiyindən Müsavat qurultayını keçirə bilmir: «Dəfələrlə müraciət etməyimizə baxmayaraq, Bakı Şəhər İcra Hakimiyyəti bizə 800-1000 nəfərin yerləşə biləcəyi zal ayırmaqdan imtina edir».

Bəyanatda deyilir ki, partiya bu il fevralın 11-də Bakı Şəhər İcra Hakimiyyətinə beşinci dəfə müraciət etsə də, indiyədək cavab ala bilməyib: «Partiya qurultayın keçirilməsi üçün siyasi hakimiyyətin maneələrini aradan qaldırmaq məqsədilə məhkəməyə müraciət edib. Mayın 12-də keçirilən məhkəmə prosesində Bakı Şəhər İcra Hakimiyyətinin nümayəndəsi məktuba qurultayın keçirilmə günü kimi qeyd edilən vaxtdan - 24 maydan 3 gün qabaq cavab veriləcəyini bildirib».

Bəyanatda bütün bunlar qanunsuzluq, siyasi oyunbazlıq kimi qiymətləndirilir, bildirilir ki, meriyanın cavab məktubunu gecikdirməsini, qurultayın keçirilməsi üçün isə ən azı bir ay vaxt lazım olmasını (başqanlığa, sərbəst Məclis üzvlüyünə və Mərkəzi Nəzarət-Təftiş Komissiyasına namizədlərin irəli sürülməsi, namizədlərin təbliğat kampaniyasının aparılması və başqa texniki işlərin görülməsi üçün) əsas götürərək Müsavat Partiyası öz qurultayını iyunun 21-nə təyin edir.

Bununla əlaqədar partiya Bakı Şəhər İcra Hakimiyyətinə rəsmi müraciət edəcək: «Müsavat Partiyası Bakı Şəhər İcra Hakimiyyətini bu vaxta qədər olan maneələrə son qoyaraq və verdiyi sözə əməl edərək, «Siyasi partiyalar haqqında» qanuna əsaslanaraq, 21 iyun 2014-cü il tarixdə qurultayın keçirilməsi üçün 800-1000 nəfərin yerləşə biləcəyi zal ayırmağa çağırır».