Almaniya Baş Qərargah rəisi general Karsten Breuer mayın 19-da 10 ildə Alman ordusunun hava hücumundan müdafiədə daha təsirli olmasını hədəfləyən hesabatı təsdiqləyib.Alman mətbuatında yer alan xəbərlərə görə, artan qeyri-müəyyənlik şəraitində Almaniya ordusunun əsas prioritetlərindən biri hava təhdidlərinə qarşı müdafiəni gücləndirməkdir və Bundesver 10 il ərzində hava hücumundan müdafiəni daha effektiv etmək üçün böyük sərmayələr yatıracaq.
Bu məqsədlə Bundesver inteqrasiya olunmuş raketdən müdafiə, qısa və orta mənzilli hava hücumundan müdafiə sistemləri, pilotsuz uçuş aparatları və dron dəstələrinə qarşı silahlar alacaq. Bundan əlavə, Almaniya ordusu müasir hava hücumu imkanlarını, o cümlədən kiberməkanda hücum və müdafiə imkanlarını genişləndirməyi və daha da inkişaf etdirməyi hədəfləyir.
“Mövcud konkret təhlükə vəziyyəti ilə əlaqədar olaraq, əsas diqqət 2029-cu ilə qədər silahlı qüvvələrin əməliyyat təchizatı baxımından hərtərəfli hazırlığının təmin edilməsinə yönəldiləcək”, – deyə hesabatda bildirilir.
Hesabatda həmçinin qeyd olunub ki, 2029-cu ildən sonra əldə edilmiş əməliyyat hazırlığı innovativ texnologiyaların və işlənmələrin inteqrasiyası yolu ilə qorunub saxlanılmalı, daha da artırılmalı və davamlı olaraq təmin edilməlidir.
Məlumata görə, Bundesver daha çox silah-sursat tədarük edəcək və ehtiyatı saxlayacaq.
Almaniyanın müdafiə naziri Boris Pistorius deyib ki, Bundesver 2029-cu ilə qədər döyüşə hazır olmalıdır.
çap et