«Divarları dağıdıblar, pəncərələri, qapını çıxarıblar. Heç «sökməyə gəlirik» deyə xəbərdarlıq da etməyiblər».
Bakı sakini Mahir Əzizov «Azadlıq»
radiosunun «Qaynar xətt»inə zəng vuraraq şikayət edib ki, yerli icra
hakimiyyəti keçmiş Malakan bağının yaxınlığında – Üzeyir Hacıbəyov küçəsi, 7
saylı ünvanda yerləşən obyektini sökür: »Obyekt binanın girişində yerləşir.
Sahəsi 20 kvadratmetrdir, ikiotaqlıdır, ofis kimi istifadə edirəm. Əvvəllər
yerində yaşayış evi olub və bir erməni ailəsi yaşayıb. 1988-ci ildə ailə köçüb
gedəndən sonra ev sökülüb, boş torpaq qalıb. Atam həmin yeri icra
hakimiyyətinin sərəncamı ilə alıb və otaq tikib. 1995-ci ildə otaq yaratdığımız
MMC-nin tərkibinə verilib. Sərəncamı təzələnib. Otağın texniki pasportu da
var».
Mahir Əzizov deyir, obyekti sökdürən
həmin binada yaşayan bir vəzifəlidir: »Yuxarı mərtəbədə Hacıbala Abutalıbovun
köməkçisi yaşayır. Əvvəldən mənimlə yola getmir. Tez-tez qulağıma çatırdı ki,
ofisimi sökdürəcək. Ancaq inanmırdım. 20 gün əvvəl 5 saylı MİS-in işçiləri mənə
deyəndə ki qonşulardan şikayət var, ofisi sökəcəklər, yenə inanmadım. Ən azı o
vaxt inanardım ki, mənə bu barədə yazılı xəbərdarlıq edəydilər. Rəsmi
xəbərdarlıq olmadığına görə, bu söhbətə qeyri-ciddi yanaşdım».
Mayın 13-də səhər qapının qarşısını
yerli icra hakimiyyətinin işçilərinin kəsdirdiyini görəndə isə ofis sahibi başa
düşüb ki, söhbət ciddidən də ciddidir: »Özləri ilə bir «KamAZ» gətiriblər.
əşyaları necə gəldi daşıyıb atırlar yük yerinə. Kondisioner, kompüter,
stol-stullar... Heç akt da tərtib etmirlər. Yiyəsiz malı kimi daşıyıb atırlar
maşına».
Səbayel rayonu, 5 saylı MİS-in rəisi
Xamis Əliyev «Qaynar xətt»ə bunları dedi:
- Harada sökülür? Kim sökür?
- Üzeyir Hacıbəyov küçəsi, 7 ünvanda...
- Məlumatsızam...
- Ora sizin ərazidir?
- Bəli.
- Bəs necə məlumatsız ola bilərsiniz?
İcra hakimiyyətinin işçiləri sökür. Texnika gətirilib...
- Məlumatsızam...
Obyekt sahibi Mahir Əzizov isə deyir,
icra hakimiyyətinin işçilərini əraziyə MİS rəisi özü gətirib. Söküntü işi də
onun nəzarəti altında aparılır: »Bütün günü söküntüyə nəzarət edir. Deyirəm, bu
söküntü qanunsuzdur. Deyirlər mən kiməm ki... Yuxarıdan göstəriş gəlib».
Hüquqşünas Namizəd Səfərov deyir ki, hər
hansı tikilinin sökülməsi yalnız məhkəmə qətnaməsi ilə mümkündür: »Hətta
özbaşına tikilini də məhkəmə qətnaməsi olmadan sökmək qanunsuz hərəkətdir».
Mahir Əzizov əmlak hüquqlarının pozulması ilə əlaqədar məhkəməyə müraciət edəcəyini deyir.
çap et