“Valideyn, məktəb, dövlət – hər kəs məsuliyyət daşıyır”

Avropa ölkəsində hər iki gəncdən biri internetdə cinsi istismara məruz qalır

“Ipsos I&O” tərəfindən Qurbanlara Dəstək Fondu (Fonds Slachtofferhulp) adından aparılan araşdırmaya görə, Hollandiyada 12-25 yaş arası gənclərin yarısı həyatlarının bir dönəmində onlayn cinsi istismar və ya cinsi təcavüzlə üzləşib.

Bu sui-istifadəyə açıq-saçıq cinsi mesajlar almaq, icazəsiz çılpaq şəkilləri paylaşmaq və ya bu şəkillərlə şantaj etmək daxildir. Araşdırmaya görə, təkcə son bir ildə 800 minə yaxın gənc bu tip zorakılığa və ya təcavüzə məruz qalıb.

“Fonds Slachtofferhulp” eksperti Natali Qaal-Franse vəziyyəti qiymətləndirərkən, “Artıq bunu təcrid olunmuş hadisələr kimi görə bilmərik”, – deyib.

Onun sözlərinə görə, bu vəziyyət cəmiyyət miqyasında struktur probleminə çevrilib və ailələr, müəllimlər, dövlət və bütövlükdə cəmiyyət həlli üçün məsuliyyət daşımalıdır.

***

Hollandiya polisi onlayn cinsi zorakılığı “artan problem” kimi təsvir edir, məktəblər də insidentlərin sayında əhəmiyyətli artım olduğunu bildirirlər. Yardım təşkilatları dəstək axtaran gənclərin sayının sürətlə artdığını bildirir. Ciddi mənzərəyə baxmayaraq, problemin tam miqyası ilə bağlı hələ də kifayət qədər məlumat yoxdur və struktur həlləri işlənib hazırlanmayıb.

***

Zorakılığa məruz qalan gənclərin böyük əksəriyyəti öz təcrübələrini heç kimlə bölüşmür. Gənclərin yalnız 4 faizi hadisə barədə polisə məlumat verir. Xəbər verməməyin əsas səbəbləri arasında utanc, günahkarlıq və başqalarının nə düşünəcəyi qorxusu daxildir.

“Gənclər dəstək və anlayış gördükdə daha tez sağalırlar”, – deyən Qaal-Franse, utanc və qurbanı günahlandırmanın hökm sürdüyü bir mühitdə bir çox gəncin təcrid olunduğunu və susduğunu vurğulayır.

***

“Fonds Slachtofferhulp” ümid edir ki, bu tədqiqat məlumatlılığı artıracaq və daha çox təhsil və məlumat işi üçün başlanğıc olacaq. Hesabatda həmçinin qeyd olunur ki, onlayn sui-istifadə fiziki cinsi zorakılıqla əlaqələndirilə bilər. Mütəxəssislərin fikrincə, cəmiyyət artıq bu problemi görməməzliyə vura bilməz. Vurğulanır ki, valideyndən tutmuş müəllimə, dövlətdən tutmuş ayrı-ayrı şəxslərə qədər hər kəs məsuliyyət daşımalıdır.