Hollandiya Qida və İstehlak Məhsullarının Təhlükəsizliyi Təşkilatı (NVWA) bu gün “Haribo” markasına aid konfet növündə marixuana aşkarlandığını və geri çağırılmaya başlanıldığını açıqlayıb. Polis hadisə ilə bağlı araşdırmalara başlayıb.“NVWA”, bir neçə insanın bu konfetləri istehlak etdikdən sonra özünü pis hiss etdiyini və hadisənin bir ailənin şikayətlərlə bağlı vəziyyəti polisə bildirməsindən sonra üzə çıxdığını bildirdi.
***
Sözügedən məhsul kilo paketlərində satılan və yararlılıq müddəti 2026-cı ilin yanvarında olan “Happy Cola F!ZZ” adlı partiyadandır. Geri çağırma yalnız istehsal kodu L341-4002307906 olan paketlərə aiddir.
“Haribo” şirkəti dünən xəbərdarlıq edib ki, bu məhsullar istehlak edilərsə, “başgicəllənmə kimi sağlamlıq problemlərinə” səbəb ola bilər. Problemin mənbəyinin hələlik məlum olmadığı, lakin ehtiyat tədbirləri kimi məhsulun geri çağırılmasına başlanıldığı və müvafiq qurumların prosesə cəlb edildiyi bildirilib.
***
Nə qədər konfetin içərisində marixuana olduğu hələlik məlum deyil. “Haribo” ehtiyat tədbiri olaraq bütün əlaqəli partiyaları geri çağırır. Marixuananın konfetin içinə necə girdiyi hələ də aydın deyil. Bəziləri maddənin qəsdən əlavə olunduğundan şübhələnsə də, bu iddialar hazırda yalnız araşdırma mövzusudur.
“Haribo” bu məhsulu alanların konfeti mağazaya deyil, birbaşa şirkətə göndərməsini istəyir. İndiyədək neçə paketin satıldığı və nə qədər insanın şikayət etdiyi barədə rəsmi məlumat hələ paylaşılmayıb.
çap et