Avtomobil yollarında xaos

“Google Maps” onlayn xəritə proqramı əksər magistralları bağlı göstərib

“The Guardian” qəzetinin məlumatına görə, dünən (mayın 29-da) dörd günlük tətilə az qalmış “Google Maps” proqramına baxanlar yolların əksəriyyətinin bağlı göstərildiyini görüblər. Bu yollara Frankfurt, Hamburq və Berlin kimi böyük şəhərlərin magistralları, eləcə də ölkənin cənub, şimal, cənub-qərb və daxili hissələrini birləşdirən avtomobil yolları daxil idi. Belçika və Hollandiyanın bəzi bölgələri də bu vəziyyətdən təsirlənib.

***

“Google Maps”dən istifadə edən insanlarda Almaniyada əksər yolların bağlı olduğu təəssüratları yaranıb. Dörd günlük dini bayramdan əvvəl meydana gələn bu vəziyyət, yollarda çox sayda insanın olması ilə yaranan xaosu daha da artırıb.

Əsas magistralların bağlı olduğu düşünülməsi insanları alternativ yollardan istifadə etməyə sövq edib ki, bu da tıxaclara və uzun növbələrə səbəb olub. Bir çox insan da kömək üçün polisə və yol idarələrinə müraciət edib.

Digər xəritə proqramlarından istifadə edənlər və ya radioda yol şəraitini dinləyənlər real vəziyyətin fərqli olduğunu görüblər. Buna görə də tıxac olduğu iddia edilən yollarda nəqliyyatın hərəkəti əslində çox rahat olub.

***

Bir çox sosial şəbəkə istifadəçisi bu vəziyyətə reaksiya verib. Bir istifadəçi “Bütün magistral yolları bağlaya bilməzlər”, digəri isə “Magistral yol sistemində sızanaq epidemiyası var”, – yazıb.

Bəzi istifadəçilər “geniş miqyaslı terror hadisəsi” ehtimalını qiymətləndirsələr də, digərləri bunun “xarici dövlət tərəfindən kiberhücum” ola biləcəyini irəli sürüblər. Bu vəziyyətə nəyin səbəb olduğu aydın deyil.

“Google” sözçüsü alman mediasına nə baş verdiyini müəyyən etmək üçün məlumatları nəzərdən keçirdiklərini söyləyib. Sözçü, istifadəçilər səhv barədə məlumat verdikdən sonra səhv “yol bağlanması” nişanlarını silməyə başladıqlarını, lakin konkret hallar barədə şərh verə bilməyəcəyini deyib.