Böyük Britaniya Abramoviçi hədələyir

Hökumət “Chelsea”nin satışından əldə olunan gəlirin Ukraynaya getməsini istəyir, milyarder təslim olmur

Britaniya hökuməti “Çelsi” Futbol Klubunun satışından əldə edilən təqribən 2,97 milyard avro vəsaitin Rusiya ilə müharibədən əziyyət çəkən ukraynalılara çatdırılmasını təmin etmək üçün rusiyalı oliqarx Roman Abramoviçə qarşı hüquqi tədbirlər görəcəyi ilə hədələyib.

Maliyyə naziri Reyçl Rives və Xarici İşlər Naziri Deyvid Lammi bu gün birgə bəyanatda, “Hökumət “Çelsi” Futbol Klubunun satışından əldə olunan gəlirin Rusiyanın qanunsuz işğalından sonra Ukraynada humanitar məqsədlər üçün istifadə olunmasını təmin etməkdə qərarlıdır”, – deyib.

Bəyanatda bu günə qədər Abramoviçlə bu məsələdə razılığın əldə edilməməsindən böyük məyusluq ifadə olunub.

“Danışıqlar üçün qapı açıq qalsa da, Ukraynada əziyyət çəkən insanların bu puldan ən qısa zamanda faydalanmasını təmin etmək üçün lazım gələrsə, məsələni məhkəməyə verməyə tam hazırıq”.

Rusiya prezidenti Vladimir Putinə yaxın olduğuna dair iddiaları təkzib edən Abramoviç 2022-ci ilin fevralında baş verən işğaldan sonra Böyük Britaniya tərəfindən sanksiyaya məruz qalıb.

Neft və qaz maqnatı olan Abramoviç 2022-ci ilin may ayında ABŞ investoru Todd Boehli və “Clearlake Capital”ın rəhbərlik etdiyi konsorsiuma “Chelsea”ni satdı. Böyük Britaniya hökuməti Abramoviçin şəxsi mənfəət əldə etməməsi şərti ilə satışa icazə verdi.

Bununla belə, satışdan əldə edilən 2,5 milyard funt sterlinqlik xalis gəlir dondurulub və hələ də qanuni olaraq Abramoviçindir. Vəsaitlərin hər hansı transferi üçün Böyük Britaniyanın Maliyyə Sanksiyalarının Tətbiqi Ofisindən (OFSI) xüsusi icazə tələb olunur.

“Çelsi”nin əl dəyişdirməsindən üç il sonra Böyük Britaniya hökuməti pulun necə istifadə ediləcəyi ilə bağlı mübahisə davam etdiyi üçün Abramoviçə qarşı hüquqi tədbirlər görəcəyi ilə hədələyib.

Böyük Britaniya bütün pulun Ukraynaya humanitar yardıma yönəldilməsini istəyir, Abramoviç isə pulun “müharibənin bütün qurbanlarına, o cümlədən Rusiyadakılara xərclənməlidir”, – deyir.

Böyük Britaniya Putinin Ukraynaya genişmiqyaslı müdaxiləsindən sonra Kiyevin ən yaxın müttəfiqlərindən biri olub. Yanvarda London Ukraynaya 4,5 milyard funt-sterlinq (təxminən 5,34 milyard avro) əlavə hərbi yardım vəd edib.