ABŞ Konqresinin Büdcə Ofisi (CBO) yanvarın 6-dan mayın 13-dək həyata keçirilən tarif artımlarının büdcə və iqtisadiyyata təsirləri ilə bağlı təhlilini dərc edib.
Təhlil, tarif artımlarının 2025-2035-ci illər dövründə ümumi büdcə kəsirini 2,8 trilyon dollar azaldacağını və bunun birbaşa tarif gəlirlərini, habelə federal borclanmanın azalması səbəbindən aşağı faiz xərclərini və iqtisadi təsirləri əhatə etdiyini təxmin edib.
ABŞ-ın ticarət tərəfdaşları tərəfindən tətbiq ediləcəyi gözlənilən cavab tariflərinin iqtisadi təsirlərinin də nəzərə alındığı təhlildə, artan qeyri-müəyyənliyin 2025-2035-ci illərdə investisiyaları gecikdirəcəyi və ümumi investisiya məbləğini azaldacağı ifadə edildi.
Təhlildə tarif dəyişikliklərinin ABŞ iqtisadiyyatının ölçüsünü azaldacağı, 2025-2035-ci illərdə orta illik artım tempinin 0,06 bənd aşağı düşəcəyi gözlənilir.
Bildirilib ki, CBO-nun təhlili 2035-ci ilə qədər real ümumi daxili məhsulun (ÜDM) yanvar ayında edilən iqtisadi təxminlərlə müqayisədə 0,6 faiz aşağı olacağını proqnozlaşdırır.
Təhlildə tarif artımının istehlakçıların və müəssisələrin alıcılıq qabiliyyətini də aşağı salacağı və artan xərclərin inflyasiya üzərində müvəqqəti yüksəliş təzyiqi yaradacağı bildirilib.
Təhlildə orta illik inflyasiyanın 2025 və 2026-cı illərdə təqribən 0,4 faiz bəndi artacağı, 2026-cı ildən qiymət indeksi səviyyəsinin 0,9 faiz yüksək olacağı və 2026-cı ildən sonra tariflərin qiymətlərə ciddi əlavə təsir göstərməyəcəyi təxmin edilib.
çap et