ABŞ Prezidenti Donald Tramp ilk səlahiyyət müddətindən etibarən mübahisəli səyahət məhdudiyyətlərini genişləndirdi və yenidən tətbiq etdi. Tram dünən 12 ölkəyə – Əfqanıstan, Myanma, Çad, Konqo Respublikası, Ekvatorial Qvineya, Eritreya, Haiti, İran, Somali, Sudan və Yəmənə tam səyahət qadağası elan edərkən, Burundi, Kuba, Laos, Sierra Leone, Toqo, Türkmənistan və Venesuelaya qismən məhdudiyyətlər qoyub. Qadağaların gələn həftənin əvvəli – iyunun 9-dan qüvvəyə minəcəyi gözlənilir.
Tramp administrasiyası bu qərarı milli təhlükəsizlik narahatlıqları və Dövlət Departamentinin hesabatları əsasında qəbul etdiyini bildirib. Qadağan olunmuş ölkələrin pasport və səyahət sənədləri ilə bağlı təhlükəsizlik prosedurlarının qeyri-adekvat olduğu və vətəndaşlarının ABŞ-da viza müddətini gecikdirmə nisbətinin yüksək olduğu iddia edilirdi. Kolorado ştatının Boulder şəhərinə viza ilə gələn bir miqrantın iştirak etdiyi son hücuma toxunan Prezident Tramp, hadisənin düzgün yoxlanılmamış xarici vətəndaşların ölkəmiz üçün yaratdığı təhlükəni vurğuladığını bildirib və “Biz onları istəmirik”, – deyib.
Prezident Tramp bildirib ki, ölkələr öz təhlükəsizlik prosedurlarını təkmilləşdirsələr, siyahı dəyişə bilər və yeni təhdidlər yarandıqca “yeni ölkələr əlavə edilə bilər”.
Qadağa Demokratlar və immiqrant hüquqları qruplarının sərt reaksiyasına səbəb olub.
Massaçusets senatoru Edvard Marki bu addımın ABŞ-ı daha təhlükəsiz etməyəcəyini söyləyib, Kaliforniya senatoru Adam Şiff isə qadağanın ABŞ-ı qlobal səhnədə daha da təcrid edəcəyini bildirib. İran-Amerika Nümayəndəsi Yassamin Ansari deyib ki, “bu ksenofobik və irqçi qadağa onun seçicilərini və onun kimi ailələrini məhv edəcək”.
“Afghan Evac” qeyri-kommersiya təşkilatının prezidenti Şoun Van Diver, qadağanın milli təhlükəsizliklə bağlı olmadığını, siyasi bir oyun olduğunu deyib: “Gəlin bunu konkret adlandıraq: bürokratiya adı altında ikinci müsəlman qadağası”.
Trampın 2017-ci ildə ilk səyahət qadağası böyük səs-küy və hüquqi çətinliklərə səbəb olmuşdu, lakin Ali Məhkəmə 2018-ci ildə üçüncü, düzəliş edilmiş variantı təsdiqlədi. Hüquq ekspertləri deyirlər ki, Ali Məhkəmənin əvvəlki qərarına görə bu yeni qadağa ilə bağlı hüquqi problemlər daha çətin ola bilər, lakin hələ də iddialar gözlənilir. Milli İmmiqrasiya Hüquq Mərkəzindən (NILC) Raha Vala qadağanın əsasını şübhə altına alaraq, “Tramp administrasiyasının onsuz da əhatəli səyahət qadağasını genişləndirmək üçün hər hansı əsaslandırma verdiyinə əmin deyiləm”, – deyib.
çap et