Almaniyada SPD-nin keçmiş əyalət sədri Leni Breymayer bir televiziya şousunda söylədiyi sözlərə görə Ştutqartdan olan fahişəxana sahibinə qarşı məhkəmə işi ilə üzləşib. Breymayer iddia edib ki, qadınlar fahişəxanalarda öz istəkləri ilə işləmirlər, bir çox qadınlar ora insan alverçiləri və dəstə üzvləri tərəfindən gətirilir. O, bu iddianın Ştutqartdakı fahişəxana biznesinə də aid olduğunu deyib.Ştutqart əyalət məhkəməsi Breymayerin daha bu sözləri təkrarlaya bilməyəcəyinə qərar verib. Məhkəmə sözçüsü bildirib ki, iddia həqiqətə uyğun olmayan fakt kimi qiymətləndirilib. Siyasətçi bəyanatını təkrar edərsə, onu cərimə gözləyir.
***
Məhkəmə sübut yükünün Breymayerin üzərinə düşdüyünü bildirsə də, bunun əvəzinə o, ümumi və mücərrəd ifadələrə əl atıb. Məhkəmə sözçüsü bildirib ki, Breymayer iddiaçıya məxsus əxlaqsızlıq yuvasının fəaliyyəti ilə bağlı konkret və obyektiv yoxlanıla bilən sübutlar təqdim etməyib.
SPD-nin keçmiş əyalət sədri və yaxın vaxtlara qədər parlament üzvü olan Breymayer həm məhkəmə xərclərini, həm də qarşı tərəfin vəkil haqqını ödəməli olacaq. Məhkəmə fahişəxana operatorunun maddi təzminat tələbini də qəbul edib.
Qərar hələ yekun deyil. Breymayer yazılı əsaslandırılmış qərarı gözləyəcəyini, daha sonra isə vəkili ilə yuxarı məhkəməyə şikayət edib-etməyəcəyinə qərar verəcəyini açıqlayıb.
çap et