“Milyarderlər üçün siçan tələsi”

Titan dalışında qətl iddiası; “OceanGate”in sahibi intiharını səhnələşdirib?

1912-ci ildə Atlantik Okeanında batan “Titanik” gəmisinin qalıqlarına gedərkən partlayan turistik mini sualtı qayıq “Titan” 5 nəfərin məzarına çevrilib.

Həyatını itirənlərdən biri Titanın sahibi, 61 yaşlı mühəndis Stokton Raş olub.

“OceanGate”in baş direktoru Raşın bu səfəri planlaşdırdığı və 2023-cü ildə dalğıc səfərində ölmək istədiyi iddia edildi.

Amerikalı yazıçı Metyu Frankın yeni çapdan çıxmış “Maraq, vəsvəsə və həvəskar cinayətkar sualtı qayıqlar dünyasında” kitabına danışan sualtı nəqliyyat vasitələri üzrə mütəxəssis və Raşın çoxdankı dostu Karl Stenli iddia etdi ki, Raş əslində bu dalışı intihar etmək üçün planlaşdırıb və dörd müştərisini ölümə sürükləyib.

“Raşın eqosu o qədər böyük idi ki, bu hekayənin xarakterində böyük rol oynamaq üçün ölməyə və öldürməyə hazır idi”.

“The Daily Mail”in məlumatına görə, Stenli bunu “heç vaxt geri qayıtmaq niyyətində olmayan, boş sualtı qayıqla ölüm dalışı” kimi səciyyələndirib.

Kitabın müəllifi Metyu Frankın sözlərinə görə, Stenli Titanı “milyarderlər üçün siçan tələsi” kimi təsvir edib.

Raşın digər dörd sərnişini qəsdən öldürdüyünə inanıb-inanmadığını soruşduqda, Stenli “Bunun baş verdiyini bilirəm” dedi.

Raş əvvəllər “OceanGate”in keçmiş işçiləri tərəfindən “psixopat” kimi təsvir edilmişdi.

***

İyunun 18-də Atlantik okeanında “Titanik”in qalıqlarına turistik turu həyata keçirən “OceanGate” şirkətinə məxsus “Titan” sualtı qayığı partlaması 5 nəfərin ölümünə səbəb olub.

Titanda olan beş nəfər arasında 58 yaşlı britaniyalı milyarder və kəşfiyyatçı Hamiş Hardinq də var idi. Pakistan əsilli iş adamı, 48 yaşlı Şəhzadə Davud və onun 19 yaşlı oğlu Süleyman Davud, hər ikisi Britaniya vətəndaşı idi. Digər iki nəfər nəhəng gəminin qalıqlarını dəfələrlə ziyarət edən 77 yaşlı fransız okeanoloq və “Titanik” mütəxəssisi Paul-Henri Nargeolet və “OceanGate”in Amerikalı qurucusu və sahibi Stokton Raş idi.

Titanın qalıqlarının ilk parçaları Kanadanın Cons limanında toplanmağa başlanıb və gəmidən kranlarla qaldırılan parçaların plastik örtüklərlə qorunduğu görülüb.