Belçikada Salmonella aşkar edilən bəzi yumurtaların markası dəyişdirilərək satışa çıxarıldığı məlum olub. Prokurorluq və FAVV tədbir görüb.Qida Zəncirinin Təhlükəsizliyi üzrə Federal Agentliyin (FAVV) və Belçikanın Antverpen prokurorluğunun birgə bəyanatında, Gil şəhərindəki “'t Hennehof” yumurta istehsalı müəssisəsinin ictimai sağlamlığı təhdid edən saxtakarlıq fəaliyyəti ilə məşğul olduğu bildirilib. Daha əvvəl Salmonella aşkar edilən yumurtaların üzərindəki markası dəyişdirilərək bazara çıxarıldığı açıqlanıb.
Hadisə 29 yanvar 2025-ci il tarixində sözügedən obyektdə FAVV tərəfindən aparılan yoxlama zamanı başlayıb. Yoxlama zamanı səlahiyyətli laboratoriya müəssisənin hövzələrindən birində Salmonella bakteriyası aşkar edib. Bundan sonra FAVV obyekti nəzarətə götürdü və yalnız bakteriyaları zərərsizləşdirmək üçün qızdırıla bilən yumurtaların krekinq obyektlərinə göndərilməsinə icazə verdi. Bazarlarda satılan yumurtalar geri çağırılıb.
Lakin quruma daxil olan yeni məlumatlarda məlum olub ki, istehsalçı şirkət bütün bu tədbirlərə baxmayaraq, qeyri-qanuni olaraq bazara yumurta çıxarmaqda davam edir.
Polis və FAVV rəsmiləri keçən həftənin cümə günü şirkətin obyektlərində axtarış aparıblar. Müəyyən edilib ki, müəssisə saxta və ya dəyişdirilmiş möhürlənmiş yumurtaları satış məntəqələrinə göndərərək, obyektində yerləşən avtomat vasitəsilə birbaşa əhaliyə satıb.
FAVV "t Hennehof" brendinə məxsus yumurtaları yenidən geri çağırmaq qərarına gəlib. Bildirilib ki, şirkətin bütün fəaliyyəti dayandırılıb, daşınmalara icazə verilməyib. Hüquqi proses davam edir.
***
FAVV daha əvvəl “Carrefour” və “Spar” kimi supermarket şəbəkələrində satılan bəzi "t Hennehof" markalı yumurtaların 1 May 2025-ci il tarixindən etibarən geri çağırıldığını açıqlamışdı.
Geri çağırılan məhsullara 6 paket jumbo XL, 6 paket, 10 və 12 qutu karton qutular və qəfəssiz toyuq yumurtaları daxildir. Bu məhsulların son istifadə tarixi 21 iyul 2025-ci il kimi göstərilib.
çap et