Pakistanın şimal-qərbində baş verən partlayış nəticəsində 4 yerli hökumət rəsmisi və polis əməkdaşı həlak olub.“Bir yüksək rütbəli dövlət məmuru, bir hökumət məmuru və iki polis zabiti həlak olub. 11 nəfər yaralanıb”, – Əfqanıstan sərhədinə yaxın Bacaur şəhərindən yüksək rütbəli polis zabiti Vaqas Rafiq AFP xəbər agentliyinə deyib. Hələlik heç kim partlayışa görə məsuliyyəti üzərinə götürməyib.
Bugünkü partlayış Pakistan Talibanının üzərinə götürdüyü eyni bölgədəki hücumda 16 əsgərin öldürülməsindən dörd gün sonra baş verib.
AFP-nin məlumatına görə, 2025-ci ilin əvvəlindən bəri son hücumun baş verdiyi Hayber Paxtunxva əyaləti və Bəlucistanda silahlı qrupların hücumları nəticəsində 300-ə yaxın insan həlak olub.
2024-cü il Pakistanda son on ildə ən ölümcül il olub. İslamabadda yerləşən Tədqiqat və Təhlükəsizlik Araşdırmaları Mərkəzinin məlumatlarına görə, keçən il hücumlarda 1600-dən çox insan həlak olub.
Taliban 20 ildən sonra 2021-ci ilin avqustunda qonşu Əfqanıstana nəzarəti bərpa etdikdən sonra Pakistanda da zorakılıq və hücumlarda artım müşahidə olunur. İslamabad Kabili ərazisinin Pakistana hücum üçün istifadəsinə icazə verməkdə ittiham edir, Taliban isə bu iddianı rədd edir.
çap et