Ukrayna öz yeni nəslini müharibədən sonrakı dövr üçün saxlamağa çalışarkən cəbhələrdə qocalar vuruşurlar.“The Wall Street Journal” (WSJ) hesabatında Ukraynanın şərqində, xüsusilə də Çasiv Yar yaxınlığındakı cəbhələrdə döyüşən əsgərlər arasında “Did” və ya “Baba” ləqəbindən geniş istifadə edilməsinə diqqət çəkilir.
İnsan resursları çatışmazlığı yaşayan ölkədə Rusiyaya qarşı cəbhələrdə döyüşənlərin əhəmiyyətli hissəsinin 40 yaşdan yuxarı əsgərlər olduğu bildirilir.
Ukraynada mövcud qanunlara görə, 25-60 yaş arası bütün kişilər hərbi xidmətə çağırıla bilər, lakin 18-24 yaş arası kişilər fiziki cəhətdən sağlam olmasına baxmayaraq, məcburi hərbi xidmətdən azaddırlar.
Vaşinqton Kiyevi məcburi hərbi xidmət yaşını aşağı salmağa çağırır, lakin Ukrayna lideri Vladimir Zelenski bunun tərəfdarı deyil. Kiyev administrasiyası bildirir ki, gənclər cəbhədə həlak olarsa, müharibədən sonrakı dövrdə ölkənin yenidən qurulması üçün zəruri olan demoqrafik struktur risk altında olacaq.
Digər tərəfdən, Zelenski administrasiyası da gəncləri orduya cəlb etmək üçün yeni təşviq proqramına başlayıb. Bunun bir hissəsi olaraq orduya gedənlərə 24 min dollar əlavə ödənişlə yanaşı, faizsiz mənzil krediti də verilir.
Bildirilir ki, təcrübəli əsgərlər adətən zirehli maşınlarda sürücü kimi xidmət edir və ya tank operatorlarına təyin olunurlar. Uzunmüddətli səngər saatları və fiziki və psixoloji dözüm tələb edən piyada mövqelərinin gənc əsgərlərə verilməsi xahiş olunur. Ancaq bu vəzifələrdə belə, hələ də yaşlı döyüşçülər təyin olunur.
Şəxsiyyətinin açıqlanmasını istəməyən ukraynalı hərbi analitik deyib ki, “Cəbhədə döyüşənlərin əksəriyyəti indi qocalardır. Amma bu vəziyyət əbədi olaraq davam edə bilməz. Bu müharibə gənclərsiz bitsə belə, gələcək qurmaq mümkün deyil”.
Dövlət gəncləri qorumaq üçün qocaları cəbhəyə göndərməklə yanaşı, hərbi balansları da nəzərə almalıdır. Təhlildə bildirilir ki, bu, Kiyev administrasiyasının ən kritik strateji sınaqlarından biridir.
çap et