Almaniyada ətin qiyməti rekord həddə qalxır. Delikates məhsullarından mal əti filetosuna, toyuq kolbasasına qədər bir çox ət məhsullarının qiyməti artıb. Xüsusilə supermarketlərdə və qəssablarda donuz ətinin qiyməti əvvəlki illə müqayisədə 20 faizə qədər bahalaşıb. Oxşar artımlar mal əti, toyuq və emal edilmiş kolbasa məhsullarında da müşahidə olunur. İri supermarket şəbəkələri son vaxtlar bratvurst, şnitzel və kolbasanın qiymətlərini artırıb.
Məsələn, “Aldi Süd”də 400 qramlıq toyuq şnitzelinin qiyməti 4,59 avrodan 4,99 avroya qalxıb. “Lidl”də 300 qramlıq toyuq ətinin qiyməti 3,39 avrodan 3,69 avroya yüksəlib.
Fermerlər və sektor nümayəndələri ətin bahalaşmasını dünya bazarında yemin – xüsusilə taxıl və soyanın qiymətinin artması ilə əlaqələndirirlər. Zəif məhsul və şiddətli quraqlıq istehsalçılara təzyiq göstərir. Artan xərclər birbaşa qəssab və market piştaxtalarında əks olunur.
Xüsusilə yay aylarında donuz ətinə tələbatın azaldığı və istehlakçıların daha yüngül alternativlərə üstünlük verdiyi bildirilir. Bundan başqa, ilin əvvəlindən donuz əti tədarükünün azalması qiymətləri də artırıb. Əvvəlki illərdə bir çox fermerlər iqtisadi səbəblərə görə donuz yetişdirilməsini dayandırıb və ya azaldıblar. Bu səbəbdən mal ətinin qiymətlərində hələ pik həddə çatmadığı və xüsusilə ilin sonunda mal qiyməsi, burger katleti və filetoların daha da bahalaşmasının gözlənildiyi bildirilir. Alman mal əti və cöngə ətinin istehsalçı qiymətləri bu il 35-40 faiz artıb.
***
Mal əti kimi dana istehsalında da heyvanların sayının azalması ilə əlaqədar xərclərin artdığı müşahidə edilir və bu, qiymətlərdə də özünü göstərir.
Baden-Vürtemberq Kənd Təsərrüfatı Nazirliyinin məlumatına görə, ətin qiymətləri əvvəlki illərdə əhəmiyyətli dərəcədə aşağı düşmüşdü, lakin 2024 və 2025-ci illərdə yenidən bahalaşıb.
çap et