İyunun əvvəlindən bəri Fransada baş verən boğulma hadisələrinin sayı ciddi narahatlıq yaradıb. Ölkənin Səhiyyə Baş İdarəsinin məlumatına görə, 1 iyun – 2 iyul 2025-ci il tarixləri arasında 109 nəfər boğularaq həyatını itirib. Onlardan 19-u uşaq olub.
Müvafiq qurumlar ölüm hallarının əsas səbəblərindən biri kimi ölkədə hökm sürən kəskin isti hava dalğalarını göstərir. Boğulmaların təxminən 60 faizi nəzarətsiz göl və çaylarda baş verib.
Fransa Səhiyyə İdarəsinin hesabatına əsasən, qeyd edilən dövrdə ümumilikdə 400-dən artıq boğulma hadisəsi qeydə alınıb. Bu rəqəm ötən ilin analoji dövrü ilə müqayisədə təxminən iki dəfə çoxdur.
Məlumatda bildirilir ki, boğulmalar əsasən ölkənin daxili su hövzələrində – nəzarətsiz göl və çaylarda qeydə alınıb. Bu da rəsmi qurumların ictimai xəbərdarlıq mesajlarını daha da aktuallaşdırır.
Hesabatda qeyd olunur ki, boğularaq həyatını itirən uşaqların sayı ötən illə müqayisədə iki dəfədən çox artıb. 2024-cü ilin müvafiq dövründə 10-dan az uşaq boğularaq ölmüşdüsə, bu il bu rəqəm 19 nəfərə çatıb.
Boğulma nəticəsində həyatını itirən uşaqların əksəriyyəti 13 yaşdan yuxarı yeniyetmələrdir. Onların böyük hissəsi nəzarətsiz, ictimai təhlükəsizlik tədbirlərinin zəif olduğu su hövzələrində boğulub.
***
Fransa Səhiyyə qurumları əhaliyə müraciət edərək alkoqollu içkilər qəbul etdikdən sonra suya girməməyə, yalnız nəzarət olunan və xilasedicilərin mövcud olduğu ərazilərdə çimməyə çağırış edib. Bildirilir ki, boğulanların mühüm hissəsi ya alkoqollu vəziyyətdə olub, ya da qeyri-rəsmi yerlərdə suya giriblər.
Uşaqlara gəldikdə isə, onların yalnız böyüklərin müşayiəti ilə suya girməsi tövsiyə olunub. Rəsmi açıqlamalarda xüsusilə ailələrə və valideynlərə diqqətli olmaları barədə xəbərdarlıqlar edilir.
***
Mütəxəssislər vurğulayırlar ki, Fransada iyun ayının ikinci yarısında temperatur normadan kəskin yüksək olub. Bu da insanların çimərliklərə, göllərə və çaylara axın etməsinə səbəb olub.
Nəticədə, nəzarətsiz ərazilərdə boğulma riski dəfələrlə artıb. Əlavə olaraq, ekspertlər bildirirlər ki, iqlim dəyişikliyi səbəbindən bu cür istilər daha tez-tez və daha intensiv şəkildə baş verəcək, bu isə boğulma riskinin də sistematik şəkildə artması deməkdir.
çap et