Yaponiya avtomobil sənayesi səhmləri ABŞ-ın gömrük rüsumlarının azaldılması ilə bağlı xəbərin ardından artıb. Yaponiya Baş naziri Şigeru İşibanın ABŞ-ın avtomobil tariflərini mövcud 25 faiz səviyyəsindən 15 faizə endirdiyini açıqlamasından sonra yerli avtomobil istehsalçılarının səhmləri yüksəlişə keçib.
“Honda” səhmləri 8 faizdən çox artarkən, “Toyota” səhmləri təxminən 12 faiz bahalaşıb. “Nissan” səhmləri 8 faizi ötüb, Mazda Motor isə 17 faizdən çox dəyər qazanıb. “Mitsubishi Motors” səhmləri isə 13 faizdən artıq sıçrayış göstərib.
Bildirilib ki, açıqlamadan sonra Cənubi Koreyalı avtomobil istehsalçısı “Hyundai” səhmləri 6 faizdən çox yüksəlib. “Kia” səhmlərində isə 0,2 faiz artım müşahidə olunub.
Qeyd edək ki, ABŞ Prezidenti Donald Tramp əvvəlki açıqlamasında 26 mart tarixində bütün idxal edilən avtomobillərə 25 faiz gömrük vergisi tətbiq edildiyini bildirmişdi. Bu qərar 2 aprel tarixindən qüvvəyə minib.
Gömrük statistikasına görə, 2024-cü ildə Yaponiya tərəfindən ABŞ-a ixrac olunan avtomobillər ölkənin ümumi ixracatının 28,3 faizini təşkil edib.
***
Yaponiya avtomobil sənayesinin ABŞ bazarındakı rolu böyükdür və gömrük rüsumlarının azalması sektora ixracat artımı şəklində müsbət təsir göstərə bilər. Bu endirim, həmçinin Yaponiya avtomobil istehsalçıları ilə Cənubi Koreya və Çin kimi rəqiblər arasında rəqabəti daha da qızışdıracaq.
Digər tərəfdən, ABŞ-da avtomobil sənayesində istehsalın və iş yerlərinin qorunması məsələsi isə müzakirə mövzusu olaraq qalır və gələcək ticarət siyasətlərinin formalaşmasında həlledici ola bilər.
çap et