Hindistan hökuməti Rusiyadan xam neft idxalını davam etdirəcək. ABŞ-ın keçmiş prezidenti Donald Trampın yeni sanksiya və 25 faizlik gömrük vergisi təhdidlərinə baxmayaraq, rəsmi Yeni Dehli mövqeyində dəyişiklik etməyib.
“The New York Times”ın məlumatına görə, Hindistan hökumətində çalışan, adlarının açıqlanmasını istəməyən iki yüksək vəzifəli şəxs, Trampın açıqlamalarına baxmayaraq, hökumətin idxal siyasətini dəyişmədiyini bildirib.
Onlardan biri deyib: “Bunlar uzunmüddətli neft müqavilələridir və bir gecədə dayandırmaq sadəcə mümkün deyil”.
Tramp: “Hindistanı yeni sanksiyalar gözləyir”
Vaxt.az xəbər verir ki, Donald Tramp “Truth Social” platformasında paylaşdığı son mesajda Hindistanın Rusiyadan silah və enerji idxalı səbəbindən əlavə sanksiyalarla üzləşə biləcəyini bildirmişdi. O, həmçinin bəyan etmişdi ki, Hindistana tətbiq olunacaq gömrük rüsumu 25 faiz olacaq.
Tramp həftə sonu jurnalistlərə açıqlamasında “Hindistan artıq Rusiyadan neft almayacaq” sözlərini işlətmişdi. Lakin bu məlumat rəsmi mənbələr tərəfindən təsdiqlənməyib.
Hindistan: “Siyasi qərar deyil, bazar mexanizmi”
Hindistan Xarici İşlər Nazirliyinin sözçüsü Randhir Caysval dünən keçirilən brifinqdə bildirib ki: “Biz enerji təchizatı ehtiyaclarımızı təmin etmək üçün bazarın vəziyyətini, təklifləri və qlobal şəraiti izləyirik.”
O həmçinin vurğulayıb ki, Hindistanın Rusiyayla sabit və sınanmış tərəfdaşlığı var və ölkənin enerji qərarları üçüncü ölkələrin prizmasından qiymətləndirilməməlidir.
Alışlar müvəqqəti azalıb, göstəriş yoxdur
“Reuters” agentliyinə danışan mənbələr isə bildirir ki, son günlərdə dövlətə məxsus neft şirkətləri – “IOC”, “HPCL”, “BPCL” və “MRPL” – Rusiyadan xam neft tələbi irəli sürməyib. Lakin bu, rəsmi qadağadan deyil, 2022-ci ildən sonra ilk dəfə Rusiyanın tətbiq etdiyi aşağı endirimlərdən qaynaqlanır.
Hindistan hökuməti isə şirkətlərə idxalı azaltmaq və ya dayandırmaq barədə heç bir göstəriş verməyib.
çap et