Fransanın Jura bölgəsində yaşayan 80 yaşlı bir qadın yalnız 1 dəqiqəlik xəstəxana qalışı üçün 1055 avro məbləğində hesabla üzləşib. Hadisə ölkədə səhiyyə sistemi və hesablandırma qaydaları ilə bağlı ciddi narazılıqlara səbəb olub.
Vaxt.az xəbər verir ki, hadisə Lonqi-sür-le-Du qəsəbəsində baş verib. 80 yaşlı qadın evində yıxıldıqdan sonra gecə saat 23:20-də təcili yardım vasitəsilə xəstəxanaya çatdırılıb. Ancaq xəstəxana sistemində “ilk gün” saat 23:59-da başladığı üçün, yalnız bir dəqiqəlik qalışa görə bir günlük xərc tətbiq olunub.
Qadının ailəsinə 3 günlük müalicə üçün təqdim olunan ümumi hesabın ilk günü üçün 1055 avro olduğu bildirilib. Həmin məbləğin 630 avrosu ailə tərəfindən ödənilib, çünki onların əlavə sağlamlıq sığortası olmayıb.
Kütləvi bağlanmalar və sistem böhranı
Mütəxəssislər bildirirlər ki, bu cür hallar Fransada səhiyyə sistemində dərinləşən struktur böhranının nəticəsidir. Son illərdə ölkə üzrə 200-dən çox doğum şöbəsi və kənd xəstəxanası bağlanıb, təcili yardım mərkəzləri isə ya qapanıb, ya da məhdud rejimə keçib. Bir çox bölgədə sakinlər həkimə çatmaq üçün 50 km-dən artıq yol getməyə məcbur qalır. Təkcə 2024-cü ilin əvvəlindən etibarən 20-dən çox xəstəxana tam bağlanıb və bu tendensiya ictimai narazılığı artırır.
Məsələyə münasibət bildirən xəstəxana rəhbərliyi, təqdim olunan hesabın Sosial Müdafiə Məcəlləsinə əsasən düzgün hesablandığını bildirib. Amma hadisə Fransada səhiyyə xidmətlərinin qiymətləndirilməsi və ədalətliliyi məsələlərini yenidən gündəmə gətirib.
çap et