ABŞ, yeni nəsil hipersəs raket sistemi “Dark Eagle”ı ilk dəfə xaricdə yerləşdirərək silah yarışında tarixi bir mərhələni keçdi. ABŞ ordusu, uzun mənzilli hipersəs raket kompleksi olan “Long-Range Hypersonic Weapon” (LRHW) və ya digər adı ilə “Dark Eagle” sistemini ilk dəfə olaraq ölkə xaricində yerləşdirdiyini elan etdi.
ABŞ Komandanlığının mətbuat xidməti, Havay adalarında yerləşən bir hərbi birliyin bu raket sistemini materik xaricində yerləşdirdiyini təsdiqləyib. Sistemin Avstraliyanın Şimal Torpaqları adlı bölgəsində yerini gizli saxladıqları bir nöqtəyə yerləşdirildiyi bildirilib.
ABŞ ordusu 9 iyulda baş verdiyi qeyd olunan bu yerləşdirməni “oyunu dəyişdirən bir qabiliyyətin nümayişi” adlandırıb. Məlumata görə, bölgəyə ən azı iki raket rampası yerləşdirilib.
***
Bu yerləşdirmə, iyul ayında Avstraliyanın ev sahibliyi ilə keçirilən çoxmillətli “Talisman Sabre 2025” hərbi təlimləri çərçivəsində həyata keçirilib.
Təlimlər zamanı ABŞ-ın digər bir raket kompleksi olan orta mənzilli MRC (“Mid-Range Capability”) sistemi ilə də canlı atəş sınaqları həyata keçirilib.
***
Hipersəs silahlar, səs sürətinin beş qatından (“Mach 5+”) daha sürətli hərəkət edə bilirlər. Balistik raketlərdən fərqli olaraq, uçuş zamanı manevr etmək qabiliyyətinə malikdirlər, bu da onları tutulması son dərəcə çətin olan silahlara çevirir.
“Dark Eagle” sisteminin təxmini mənzili 2 min 775 kilometrə qədər çatır. Hər “LRHW” batareyasında dörd raket rampası var və bu rampalar cəmi səkkiz raket daşıya bilir.
Quruda yerləşdirilən bu strateji silah kompleksi, əsasən düşmənin hava hücumundan müdafiə sistemlərini yarmaq, uzaq mənzilli hücum imkanlarını sıradan çıxarmaq və kritik hədəfləri məhv etmək üçün nəzərdə tutulub.
***
ABŞ-ın əsas qlobal rəqibləri olan Rusiya və Çin, eləcə də regional təhlükə hesab edilən Şimali Koreya və İran da hipersəs raketləri üzərində işlədiklərini və artıq bəzi sistemləri yerləşdirdiklərini iddia edirlər.
Daha əvvəl Newsweek nəşrinə danışan bir ekspert, bu texnoloji yarışın belə xarakterizə olunduğunu demişdi: “Heç bir ölkə bu yarışdan geri qalmaq istəmir”.
çap et