Balıkəsirin Sındırgı rayonunda baş verən 6,1 bal gücündəki zəlzələ bölgədə həm fiziki, həm də psixoloji təsirlər yaradıb. Təkanların ardınca 4,6; 4,1 və 4 bal gücündə üç ardıcıl təkanlar qeydə alınıb.
Fəlakət və Təcili Yardım Departamentinin (AFAD) məlumatına görə, 4,6 bal gücündəki zəlzələ 6,78 km, 4,1 bal gücündəki 7 km, 4 bal gücündəki isə 16,07 km dərinlikdə baş verib.
Rəsmi açıqlamalar və ilkin vəziyyət
Sındırgı bələdiyyə başçısı Sərkan Sakın sözlərinə görə, hazırda rayonun 60-70%-nə yardım və yoxlama qrupu çatıb. Rəsmi olaraq tələfat qeydə alınmayıb. Lakin kəndlərdən gələn məlumatlara əsasən, 10-dan çox bina dağılıb, dağıntılar altındakı iki nəfərə çatmaq üçün iş aparılır.
Türkiyə daxili işlər naziri Əli Yerlikayan bildirib ki, ümumilikdə 29 nəfər xəsarət alıb, onların vəziyyəti ağır deyil. Dörd yaralı xəstəxanaya yerləşdirilib.
Mütəxəssis rəyi
“Habertürk TV” efirində danışan professor Zəfər Akçıq zəlzələnin texniki olaraq “normal şiddətli” olduğunu, qaydalara uyğun tikililərdə böyük dağıntıya səbəb olmamalı olduğunu vurğulayıb. Lakin Türkiyənin mövcud tikinti fondu nəzərə alındıqda zədələrin qaçılmaz olduğunu bildirib.
Akçıq davamlı təkanların olmasını “müsbət xəbər” kimi qiymətləndirərək bunun sönümlənmə prosesinə işarə olduğunu qeyd edib.
Sosial və psixoloji nəticələr
Zəlzələnin şiddəti və dağıntı xəbərləri bölgə əhalisində qorxu və narahatlıq yaradıb. Xüsusilə kənd yerlərində binaların zəif konstruksiyası, əhalinin zəlzələ zamanı təhlükəsizlik qaydalarına kifayət qədər bələd olmaması riskləri artırır.
Bölgədə təkanların davam etməsi əhalini həyəcanlı saxlayır, lakin mütəxəssislərin verdiyi “sönümlənmə” açıqlamaları psixoloji təsirləri qismən azaldır.
Sındırgı zəlzələsi bir daha göstərdi ki, təbii fəlakətlər yalnız geoloji deyil, həm də sosial infrastruktur məsələsidir. Güclü zəlzələlərdə can itkisini minimuma endirmək üçün təkcə fövqəladə hallara müdaxilə sistemini deyil, həm də möhkəm tikinti standartlarını təmin etmək vacibdir.
çap et