Paris yaxınlığındakı Corbeil-Essonnes şəhərində fəaliyyət göstərən və “Fransanın ən ucuz kababı” şüarı ilə məşhurlaşan İzmir restoranı 3,5 avroya satdığı kabablarla gündə 700-800 porsiya satırdı. Lakin müəssisə, sahibinin fərqinə varmadığı rəsmi bildiriş səbəbilə 4 avqustda prefektura qərarı ilə bağlandı. Qərara səbəb, aprelin sonunda keçirilən yoxlamada müəyyən edilən bəzi gigiyena çatışmazlıqlarının aradan qaldırıldığına dair sübutun vaxtında təqdim edilməməsi idi.
“Yeməklərimizdə problem yox idi”
Restoran sahibi Eser Aksu, qida təhlükəsizliyində heç bir problem olmadığını, yalnız texniki çatışmazlıqlar olduğunu bildirib. Yoxlama zamanı soyuducuların temperaturunun 6°C əvəzinə 4°C olması, quru ərzaqların döşəmədən palet üzərinə qaldırılması və təmizlik vasitələrinin uyğun şəkildə yerləşdirilməsi kimi iradlar qeyd olunmuşdu.
Aksuya çatışmazlıqları aradan qaldırmaq üçün 4 həftə vaxt verilmişdi. O, rəsmi məktuba səhhət problemləri səbəbindən baxa bilmədiyini, işçilərdən birinin məktubu kənara qoyub unutduğunu deyib.
Sosial şəbəkədə imic itkisi
Bağlanmadan sonra sosial mediada “gigiyena fəlakəti”, “həşərat basqını” və “korlanmış ət” kimi əsassız iddialar yayıldı. Lakin yoxlama hesabatında müəssisədə həşərat olmadığı açıq şəkildə qeyd olunub. Restoranın daimi müştəriləri və sahibi, bu şayiələrin rəqabət qısqanclığından qaynaqlandığını düşünür.
Maliyyə itkisi böyükdür
Restoranın 5 əməkdaşı işsiz qalıb, bağlanma müddətində isə 15.000–20.000 avro zərərə uğradığı bildirilib. Məqsəd sentyabr ayında məktəblər açılana qədər yenidən fəaliyyətə başlamaqdır.
çap et