Türkiyə Statistika Qurumu (TÜİK) ilk dəfə olaraq rüblük (üç aylıq) əhali statistikasını açıqlayıb. Məlumatlara görə, 2024-cü ilin iyun ayı etibarilə ölkənin əhalisi əvvəlki rüblə müqayisədə 90 min 456 nəfər artaraq 85 milyon 824 min 854 nəfərə çatıb. Ötən ilin eyni dövrünə nisbətdə isə artım 243 min 588 nəfər olub.
Cinsiyyət bölgüsünə görə, kişi əhalinin sayı 42 milyon 923 min 584 nəfər (ümumi əhalinin 50,01%-i), qadın əhali isə 42 milyon 901 min 270 nəfər (49,99%) təşkil edir.
15–24 yaş aralığında sayılan gənclərin ümumi sayı 12 milyon 721 min 3 nəfərdir. Bu göstərici 2024-cü ilin sonuna görə 42 min 156 nəfər, ötən ilin eyni dövrünə görə isə 110 min 77 nəfər azalıb. Son 10 ildə gənclərin sayı 178 min 664 nəfər, 2021-ci ildən bəri isə ardıcıl şəkildə azalıb və 4,5 ildə ümumilikdə 250 min 286 nəfər azalma qeydə alınıb.
0–4 yaş qrupu ilk dəfə 5 milyonun altına düşüb
İyun ayı etibarilə 0–4 yaşlı uşaqların sayı 4 milyon 945 min 831 nəfər olub. Bu rəqəm 2024-cü ilin sonuna görə 136 min 555 nəfər, ötən ilin eyni dövrünə görə isə 277 min 384 nəfər azdır. Uşaq əhalisi 2018-ci ildən bəri azalır — həmin il bu yaş qrupunda 6 milyon 484 min 986 nəfər var idi, son 7 ildə isə 1 milyon 539 min 155 nəfər azalma baş verib.
çap et