Rusiya Prezidenti Vladimir Putin Şimali Koreya lideri Kim Çen In ilə telefonla danışaraq, cümə günü ABŞ-ın Alyaska ştatında ABŞ Prezidenti Donald Tramp ilə keçirəcəyi görüş barədə məlumat verib. Bu barədə Kremlin bu gün yaydığı açıqlama deyilir.
Şimali Koreya Mərkəzi Xəbər Agentliyi (KCNA) də iki liderin telefon danışığını xəbər verib, lakin Putin ilə Tramp arasında avqustun 15-də baş tutacaq görüşdən bəhs etməyib.
KCNA-nın məlumatına görə, Kim və Putin ötən il imzalanmış strateji tərəfdaşlıq sazişi çərçivəsində iki ölkə arasında münasibətlərin inkişafını müzakirə edib və “gələcəkdə əməkdaşlığı gücləndirmək iradələrini təsdiqləyiblər”.
Vaxt.az xəbər verir ki, Putin, Ukraynaya qarşı müharibədə Rusiyanın qərbində yerləşən Kursk bölgəsinin “azad edilməsinə” Şimali Koreyanın göstərdiyi yardıma görə minnətdarlığını bildirib. O, həmçinin “Koreya Xalq Ordusu üzvlərinin göstərdiyi cəsarət, qəhrəmanlıq və fədakarlıq ruhunu” yüksək qiymətləndirib.
Cənubi Koreya kəşfiyyatının qiymətləndirməsinə görə, Şimali Koreya Ukrayna böhranında Rusiyanın qərb bölgəsindəki hərbi əməliyyatlara dəstək üçün 10 mindən çox əsgər göndərib və daha çox qüvvə yerləşdirməyi nəzərdən keçirir.
çap et