Polşa, “F-16” döyüş təyyarələrinin hamısını “Blok 72 Viper” versiyasına yüksəltmək üçün ABŞ ilə 3,8 milyard dollar dəyərində müqavilə imzalayıb. Müqavilənin bölgədə mühüm hava üstünlüyü təmin edəcəyi bildirilib və 48 “F-16C/D” döyüş təyyarəsinin hamısını əhatə edəcəyi vurğulanıb.
Polşa Milli Müdafiə Naziri Vladislav Kosiniyak-Kamış (Wladyslaw Kosiniak-Kamysz), imza mərasimində verdiyi açıqlamada, ABŞ ilə 3,8 milyard dollar dəyərində imzalanan modernləşdirmə müqaviləsinin ölkənin 48 “F-16C/D Block 52+” təyyarəsinin hamısını əhatə etdiyini söyləyib.
“Modası keçməyəcək”
20 ildən uzun müddət istifadə edilən təyyarələrə pilotların böyük yaxınlıq duyduğunu bildirən Kosiniak-Kamış, “Bu təyyarə heç vaxt darıxdırıcı olmayacaq, modası keçməyəcək. Həmişə daha yeni, daha üstün və təkmilləşdirilmiş versiyaları olacaq,” deyib.
Kosiniak-Kamış əlavə edib ki, mövcud “C/D” təyyarələr çox yaxşıdır, amma 20 il sonra ölkənin təhlükəsizliyinə yönələn təhdidlər qarşısında kifayət etmir.
Bu il Ümumi Daxili Məhsulun (ÜDM) 4,7%-ni müdafiəyə ayıran Polşa, gələn il bu nisbəti 5%-ə çatdırmağı hədəfləyir.
Polşa ilk ölkələrdən biri olacaq
Əgər Polşa hədəfinə çatsa, iyun ayında keçirilən tarixi NATO zirvəsində ittifaq üzvlərinin razılaşdığı, müdafiə xərclərinə ÜDM-nin 5%-ni ayırma hədəfinə çatan ilk ölkələrdən biri olacaq.
Həmçinin, xəbərdə vurğulanıb ki, 2030-cu ilə qədər Polşanın tank sayı İngiltərə, Almaniya, Fransa və İtaliyanın ümumi tank sayından çox olacaq.
çap et