Tədqiqatçılar bildirir ki, insanlar daha çox icma içində yaşadıqda “daha xoşbəxt və həyatlarından daha məmnun” hiss edirlər. Yeni bir araşdırma, xoşbəxtliyin açarının istehlakı azaltmaq və daha sadə bir həyat sürmək ola biləcəyini göstərir.
“Otago” Universitetinin alimlərinin apardığı tədqiqat göstərdi ki, davamlı həyat tərzi qəbul edib istehlakçılığın cazibəsinə müqavimət göstərənlər daha xoşbəxt və daha məmnun hiss edirlər.
Mindən çox Yeni Zelandiyalı ilə aparılan sorğu göstərdi ki, “ixtiyari sadəliyə” sadiq qalmaq şəxsi qarşılıqlı əlaqə və sosial əlaqə üçün daha çox imkan yaradaraq rifahı artırır. Tədqiqatçılar qeyd edirlər ki, cəmiyyət bağçaları və borc vermə platformaları kimi təşəbbüslər daha az maddi yönümlü həyat yaşayanlar tərəfindən daha çox istifadə olunur və bu, iştirakçılara “məmnunluq” və “məna” hissi verir.
Araşdırma həmçinin göstərdi ki, qadınların sadə həyat tərzini qəbul etmə ehtimalı kişilərdən daha yüksəkdir, lakin bunun səbəbini anlamaq üçün daha çox araşdırmaya ehtiyac var.
İştirakçıların orta yaşı 45, illik ev gəliri isə orta hesabla 50 min dollar idi. Müəllif Lie Votkins (Leah Watkins) bildirir ki, istehlakçı mədəniyyəti xoşbəxtliyi adətən yüksək gəlir səviyyəsi ilə əlaqələndirir, yəni bahalı və lüks maddi əşyalar almaqla, amma onların tədqiqatları tam əksini göstərir: “Araşdırmalar açıq şəkildə göstərir ki, həyata maddi yönümlü yanaşmalar və təcrübələr xoşbəxtliyin və rifahın artmasına gətirmir”.
Bundan əlavə, bu yanaşma planetin sağlamlığı üçün zəruri olan davamlı istehlaka da töhfə vermir.
“Journal of Macromarketing” adlı elmi jurnalında dərc olunan məqalədə göstərilir ki, daha sadə həyat iştirakçılar üçün daha çox ictimai iştirak və daha böyük “məna” hissi yaradır.
Müəllif Rob Aytken (Rob Aitken), “Rifahı təmin edən birbaşa maddi sadəliyə sadiqlik deyil, münasibətlərdən, sosial əlaqələrdən, ictimai iştirakdan və məqsədli, mənalı bir həyat sürmək hissindən yaranan psixoloji və emosional ehtiyacların qarşılanmasıdır”.
Milyarderlərin toylarının milli hadisə kimi qəbul edildiyi və özəl yaxtaların yeni status simvoluna çevrildiyi bir dünyada ixtiyari sadəlik, həddə qarşı kifayətlilik, istehlaka qarşı əlaqə və maddi yönümlülüyə qarşı mənanı önəmsəyən sakit və güclü bir alternativ təqdim edir.
Harvard Yetkinlik İnkişafı Araşdırmasına əsaslanaraq aparılan tədqiqat göstərmişdi ki, zaman içində davam etdirilən yaxın münasibətlər insan xoşbəxtliyinin əsasını təşkil edir. Bu iş 85 ildən çox müddət ərzində mindən çox şəxsin həyatını izləyərək sağlam yaşlanma meyllərini araşdırır.
Ən xoşbəxt olanlar, mükəmməl münasibətləri ani diqqətsizlik səbəbi ilə itirənlərdən fərqli olaraq, dostları ilə əlaqədə qalmağa, dostlarını və ailəsini görməyə diqqət yetirirdilər.
Kiçik hərəkətlər – mesaj göndərmək, e-poçt yazmaq və ya zəng etmək – əlaqədə qalmaq və xoşbəxtlik üçün vacib bağları qorumaqda vacib yollar hesab olunur.
Bədənimizin sağlam qalması üçün fiziki məşqlərin davamlı olması lazım olduğu kimi, sosial sağlamlıq da münasibətlərimizi qoruyan və güclü saxlayan davamlı bir fəaliyyət olmalıdır.
Əvvəlki araşdırmalar göstərmişdi ki, sosial mediadan və internetdən uzaq durmaq ruh sağlamlığını yaxşılaşdırmağa kömək edə bilər.
çap et