Qızılın qiyməti ABŞ prezidenti Donald Trampın Federal Ehtiyat Sisteminin (FED) idarə heyətinin üzvü Liza Kukun istefasını tələb etməsi ilə yüksəlib. Bu addım, mərkəzi bankın müstəqilliyinə dair narahatlıqları gücləndirərək qızıla “təhlükəsiz liman” tələbatını artırıb.
Trampın Kukun ipoteka fırıldağı ilə bağlı iddialara görə vəzifədən getməsini istəməsindən sonra qızılın qiyməti təxminən 1% artaraq 3.342 dolları ötüb. Əgər Kuk istefa versə, bu Trampa daha yumşaq mövqeli bir nümayəndə təyin etmək imkanı yaranacaq. Lakin Kuk, FED-dəki vəzifəsini davam etdirmək niyyətində olduğunu açıqlayıb.
İrəliyə dönük olaraq investorlar, sabah keçiriləcək illik “Jackson Hole” simpoziumunda FED sədri Cerom Pauellin açılış çıxışını diqqətlə izləyəcək. Bazarlar, FED-in gələn ay faizləri ən azı 25 baza bəndi azaltmasını gözləyir ki, bu da faiz gəliri olmayan qızıl üçün müsbət amil sayılır.
"Fitch Solutions"un BMI bölməsi, “Bazarlar sentyabrda FED-in faiz endirimini nəzərə alaraq mövqelənir. Qızıl qiymətləri önümüzdəki həftələrdə yüksək qalmağa davam edəcək. 2025-in qalan hissəsində qızılın uns qiymətinin 3.200–3.600 dollar aralığında dəyişəcəyini proqnozlaşdırırıq”, – deyib.
Bakı vaxtı ilə 5:00-da qızılın qiyməti 3.342,40 dollarda sabit qalıb. “Bloomberg Dollar Spot İndeksi” tarazlaşıb. Gümüş, palladium və platin qiymətlərində də dəyişiklik olmayıb.
çap et