Rusiya-Ukrayna müharibəsində sülh danışıqları prosesi davam edərkən, Moskvadan yeni açıqlama gəlib.
Rusiya Xarici İşlər naziri Sergey Lavrov bildirib ki, dövlət başçısı Vladimir Putin Ukrayna lideri Vladimir Zelenski ilə görüşməyə hazırdır, lakin bütün məsələlər əvvəlcədən nəzərdən keçirilməlidir.
Lavrov Zelenskinin razılaşmanı imzalama səlahiyyəti olub-olmadığı barədə sual işarəsi olduğunu qeyd edib: “Ukrayna rejimi və nümayəndələri mövcud vəziyyəti çox açıq şəkildə şərh edərək, davamlı, ədalətli və uzunmüddətli həll yoluna maraq göstərmədiklərini aydın şəkildə nümayiş etdirirlər”.
Qeyd olunur ki, Putin və ABŞ Prezidenti Donald Tramp ötən həftə (avqustun 15-də) Alyaskada, dörd ildən çox müddətdə ilk dəfə keçirilən Rusiya-ABŞ zirvəsində görüşüblər. İki lider, İkinci Dünya müharibəsindən bəri Avropada baş verən ən qanlı müharibəni necə sona çatdırmağın yollarını müzakirə ediblər.
Alyaskadakı zirvə görüşlərindən sonra Tramp bildirib ki, avqustun 18-də Rusiya və Ukrayna liderləri arasında görüş təşkil etməyə başlayıb və sonradan onun da iştirak edəcəyi üçtərəfli zirvə keçiriləcək.
Jurnalistlərin Putinin Zelenski ilə görüşməyə hazır olub-olmadığını soruşması üzərinə Lavrov, “Dövlət başçımız Zelenski də daxil olmaqla, görüşməyə dəfələrlə hazır olduğunu söyləyib. Lakin bu, yalnız ən yüksək səviyyədə həll olunmalı bütün məsələlərin düzgün şəkildə müzakirə olunacağı və ekspertlər, nazirliklər tərəfindən uyğun təkliflərin hazırlanacağı şərti ilə mümkündür”, – deyib.
“Əlbəttə, gələcək razılaşmaların imzalanması zamanı Ukrayna tərəfdə bu razılaşmaları imzalayan şəxsin səlahiyyəti məsələsi də həll olunmalıdır”, – deyə Lavrov fikrini yekunlaşdırıb.
çap et