ABŞ ilə Çin arasında davam edən ticarət münaqişəsində atəşkəs fonunda, Meksika hökuməti Çin mallarına tətbiq olunan gömrük rüsumlarını artırmağı planlaşdırır. Hökumət bu addımla ölkədəki yerli istehsalçıları ucuz idxaldan qorumaq və ABŞ Prezidenti Donald Trampın uzunmüddətli tələblərini yerinə yetirmək məqsədi güdür.
“Bloomberg”ə danışan mənbələr bildiriblər ki, avtomobillər, tekstil məhsulları və plastiklər daxil olmaqla müxtəlif idxal məhsulları üçün gömrük rüsumları artırıla bilər. Mənbələr həmçinin qeyd edirlər ki, digər Asiya ölkələrinin mallarına da oxşar rüsumlar tətbiq edilə bilər, lakin konkret faiz və tariflər hələ müəyyən olunmayıb və plan dəyişə bilər.
Meksika Prezidenti Klavdiya Şeynbaumun hökuməti 2026 büdcə layihəsini sentyabrın 8-dək Konqresə təqdim etməyi planlaşdırır. Layihə qanunverici orqanın təsdiqini tələb edəcək, lakin Şeynbaumun partiyası və müttəfiqləri hər iki palatada üçdə iki çoxluğa malik olduğundan, Konqresdə edilə biləcək dəyişikliklər məhdud olacaq.
Boston-da yerləşən “State Street Global Markets” şirkətinin baş strateqi Ninq Sun bildirir ki, Çinin Latın Amerikası bölgəsinə ixracatı bu il artıb və bu, ABŞ bazarındakı azalmaları kompensasiya etməyə kömək edib. Sun əlavə edir ki, Meksika həm ABŞ-ı razı salmaq, həm də yerli istehsal bazasını qorumaq məqsədi ilə bu strategiyanı izləyir.
Analitiklər qeyd edirlər ki, Meksikanın gedişi həm də ABŞ ilə iqtisadi və xarici siyasətini uyğunlaşdırmaq məqsədi daşıyır. Ölkədəki istehsalçıları qorumaq və idxal asılılığını azaltmaq üçün gömrük rüsumlarının artırılması, xüsusilə avtomobil, tekstil və plastik məhsulları üçün mühüm addım hesab edilir.
çap et