Kripto aktivlər bazarının ən böyük şirkətlərindən biri olan “Tether”, “Bitcoin” üçün hazırlanmış növbəti nəsil rəqəmsal aktiv protokolu RGB (Really Good for Bitcoin – Bitcoin üçün Həqiqətən Yaxşı) üzərində sabit kriptovalyuta USDT-ni (United States Dollar Tether – ABŞ dollarına bağlı Tether) işə salacağını açıqlayıb. 28 avqust 2025-ci ildə verilən məlumata görə, USDT artıq RGB protokolu vasitəsilə birbaşa “Bitcoin” şəbəkəsində əməliyyat oluna biləcək.
RGB-nin əsas məqsədi — “Bitcoin” şəbəkəsi üzərində daha geniş funksionallıq təmin etməkdir. Yəni, bu protokol “Bitcoin”in sadəcə dəyər saxlama vasitəsi və ödəniş sistemi olmaqla kifayətlənməyib, rəqəmsal aktivlərin buraxılması, gizlilik və miqyaslana bilmə kimi imkanları da dəstəkləməsini nəzərdə tutur.
RGB-nin əsas üstünlükləri
Miqyaslana bilmə (scalability) – əməliyyatların daha sürətli və yüngül həyata keçirilməsi.
Gizlilik (privacy) – istifadəçilərin əməliyyatlarının daha məxfi qalması.
İstifadəçi nəzarəti – aktivlərin saxlanması və idarəsi tamamilə istifadəçinin əlində olur.
Beləliklə, RGB protokolu “Bitcoin”in üzərində sabit kriptovalyutalar (məs: USDT) və digər rəqəmsal aktivlərin buraxılmasına imkan verən, onu yeni nəsil maliyyə ekosisteminə daha yaxınlaşdıran açıq texnologiyadır.
RGB qısa müddət əvvəl 0.11.1 versiyası ilə əsas şəbəkəyə (mainnet) keçirilib. Bu protokol “Bitcoin”in yalnız dəyər saxlama vasitəsi olmaqdan kənara çıxmasını hədəfləyir. RGB istifadəçilərə rəqəmsal aktivləri gizlilik, miqyaslana bilmə və fərdi nəzarət çərçivəsində buraxmağa imkan verir. Bu da sabit kriptovalyutaların “Bitcoin” üzərində yerli şəkildə istifadəsinə şərait yaradır.
Sabit kriptovalyutalarda yeni mərhələ
“Tether”in RGB inteqrasiyası sayəsində istifadəçilər USDT-ni birbaşa “Bitcoin” şəbəkəsində saxlaya və transfer edə biləcəklər. İstifadəçilər həm “Bitcoin”, həm də USDT-ni eyni cüzdan infrastrukturunda idarə edə, əməliyyatlarını isə daha gizli, müstəqil və oflayn formada həyata keçirə biləcəklər.
Yeni sistem sürətli, gizli və yüngül ödəniş imkanları ilə qlobal miqyasda milyardlarla insana çıxış imkanı verməyi hədəfləyir. “Bitcoin”in yüksək təhlükəsizlik və mərkəzləşdirilməmiş quruluşu ilə “Tether”in sabitlik təmin edən modeli birləşdikdə, sabit kriptovalyutaların “Bitcoin” ekosistemində daha geniş istifadəsinin yolu açılır.
“Tether”in məqsədi: “Bitcoin”i gündəlik istifadəyə gətirmək
“Tether”in baş direktoru Paolo Ardoino açıqlamasında “Bitcoin”in öz blokçeyni üzərində yerli, yüngül, gizli və miqyaslana bilən sabit kriptovalyutaya ehtiyacı olduğunu vurğulayıb. Onun sözlərinə görə, RGB protokolunun verdiyi imkanlar USDT-ni bu hədəfə daha yaxınlaşdırır. Ardoino bu inteqrasiyanın “Bitcoin”i daha azad maliyyə gələcəyinin əsası halına gətirmə vizyonlarını gücləndirdiyini bildirib.
Şirkət bu addımı ilə təkcə sabit kriptovalyutalara çıxışı artırmaqla kifayətlənmir, həm də “Bitcoin”in yalnız ilk kriptovalyuta deyil, həm də qlobal gündəlik ödəniş platforması kimi istifadəsini təşviq etməyi hədəfləyir.
Yeni nəsil maliyyə tətbiqləri üçün zəmin
RGB protokolu sabit kriptovalyutaların birbaşa “Bitcoin” üzərində təhlükəsiz və gizli şəkildə istifadəsini mümkün etməsi ilə bazar üçün kritik dönüş nöqtəsi sayılır. Bu, həm inkişaf etdiricilər, həm də son istifadəçilər üçün daha fərqli və şəxsi maliyyə həlləri yaratmaq imkanı açır.
“Tether”in inteqrasiyası RGB-nin miqyaslana bilmə, gizlilik və istifadəçi suverenliyi üstünlükləri ilə birləşərək rəqəmsal aktivlər dünyasında yeni perspektivlər açır. İstifadəçilər artıq yalnız mərkəzləşdirilməmiş şəbəkədə əməliyyat aparmaqla kifayətlənməyəcək, eyni zamanda sərvətlərini daha təhlükəsiz və azad mühitdə qoruya biləcəklər.
çap et