92 yaşındakı marafonçu Emma Mariya Mazenqanın (Emma Maria Mazzenga) əzələ hüceyrələri, onun əsl bioloji yaşının 70 il gənc olduğunu göstərdi. Bu, alimlərin diqqətini çəkdi və onun uğurunun sirrini öyrənmək üçün araşdırmalar aparıldı.
İtaliyanın “Pavia” Universitetindən tədqiqatçılar Mazzenqanın kuadrisepsindən nümunələr götürərək ABŞ-a göndərdilər. Qadına həm ağırlıq qaldırma, həm də velosiped üzərində testlər tətbiq edildi, kardiyovaskulyar vəziyyəti və ayaqlarının gücü ölçüldü.
Araşdırma nəticəsində məlum oldu ki, dörd dünya rekordu sahibi Mazzenqanın yavaş işləyən əzələ liflərinin bioloji yaşı 20-dir. Kardiorespirator davamlılığı isə 50 yaşındakı insanlara yaxın olduğu aşkarlandı.
ABŞ-dakı “Marquette University”dən doktor Marta Colosio (Marta Colosio) qeyd edib ki, uzun illər İtaliyada izlənən Mazzenqanın heç bir bənzəri yoxdur. Tədqiqatçılar həmçinin bildiriblər ki, yaşlandıqca nələri etmək mümkün olduğunu onun üzərində öyrənə biləcəklər.
“Marquette University”dən Kris Sandberq (Chris Sundberg), baş müəlliflərdən biri olaraq, qadının sirrini açıqlayıb: “Ya genetik, ya həyat tərzi, ya da hər ikisinin qarışığı ilə beyin, sinirlər və əzələlər arasındakı əlaqəni 90 yaşında belə digər yaşlı insanlara nisbətən daha sağlam şəkildə qoruyur.”
Mazzenqa “The Washington Post”a danışaraq bildirib ki, o, 19 yaşında qaçmağa başlayıb, amma universiteti bitirdikdən sonra dörd il ailə səbəbi ilə ara verməli olub.
1.55 m boyundakı qadın, yaşlandıqca öz qrupunda rəqib tapmaqda çətinlik çəkdiyini deyib: “İtaliyada yalnız mən varam. Dünya çempionatlarında bir Amerikalı daha var.”
O, müntəzəm məşq etdiyini, yeməkdə ölçünü qoruduğunu və idmana başlamazdan əvvəl həkim yoxlamasından keçməyin vacib olduğunu vurğulayıb. Mazzenqa “Heç vaxt bir günün tamamını daxili məkanlarda keçirmirəm”, – deyib.
çap et