Fransanın Paris, Lion və bir çox şəhərlərində məktəb yeməkxanalarında artıq tuna balığı verilmir. Səbəb – aparılan testlərdə balıqların hamısında zəhərli civənin aşkar olunmasıdır.
“Bloom” və “Foodwatch” adlı vətəndaş təşkilatları 2024-cü ilin oktyabrında 148 müxtəlif konservləşdirilmiş tuna balığını laboratoriyalarda yoxlatdırıb. Nəticələr şokedici olub. Nümunələrin 100%-i civə ilə çirklənmiş çıxıb. Üstəlik, konservlərin yarısından çoxunda miqdar icazə verilən həddi də keçib.
Uşaqlar üçün risk daha böyükdür. Mütəxəssislərə görə, az yaşda çox miqdarda civə qəbul edilməsi əqli gerilik, yaddaş pozuntusu, sinir-əzələ sistemində nasazlıqlar və davranış problemlərinə yol aça bilər.
Qərarı qəbul edən səkkiz bələdiyyə birgə bəyanatda “uşaqların sağlamlığını qorumaq üçün ehtiyatlı davranırıq” deyə vurğulayıb. Onlar tuna balığının menyulara geri dönməsi üçün civə limitinin 0,3 mq/kq-a endirilməsini tələb edir.
Konserv istehsalçıları isə iddialara etiraz edərək, qanuni hədd olan 1 mq/kq dəyərinin aşılmadığını bildiriblər. Sektor nümayəndələri əlavə ediblər ki, son səkkiz ilin yoxlama nəticələri də bu arqumenti təsdiqləyir.
çap et