“Fənərbaxça” iyun 2024-də baş məşqçi postuna gətirdiyi məşhur portuqaliyalı mütəxəssis Xose Mourinyo (Jose Mourinho) ilə əməkdaşlığı dayandırıb.
Sarı-mavi klubun cümə günü yaydığı açıqlamada deyilir: “Peşəkar Futbol A Komandamızın 2024–2025 mövsümündən etibarən baş məşqçisi olan Xose Mourinyo ilə yollarımız ayrılmışdır. Komandamız üçün bu günə qədər göstərdiyi xidmətlərə görə ona təşəkkür edir, gələcək karyerasında uğurlar arzulayırıq”.
Portuqaliyalı mütəxəssis illik 10,5 milyon avro maaşla və böyük gözləntilərlə vəzifəyə gətirilmişdi. Lakin ötən mövsüm çempionluğu əzəli rəqibi “Qalatasaray”a uduzan “Fənərbaxça” bu mövsüm də Çempionlar Liqasının təsnifat mərhələsində aldığı məğlubiyyətlə Avropa mübarizəsini erkən başa vurub.
Mourinyo Çempionlar Liqasının təsnifat mərhələsində qarşılaşdıqları “Benfika” oyunları öncəsi klubun transfer siyasətindən narazılığını gizlətməmişdi. O bildirmişdi: “Əgər Çempionlar Liqası klub üçün həyati önəm daşısaydı, “Feyenoord”la “Benfika” matçları arasında nəsə edilərdi”.
Baş məşqçi klub rəhbərliyini hədəf alaraq, “Fənərbaxça” ikinci prezidenti Həmdi Akının “Benfika” ilə matça dair “Çox rahatlıqla keçə bilərik. Niyə keçməyək?!” açıqlamasına da münasibət bildirmişdi: “Xüsusilə sabahkı oyunun asan və ya çətin olduğuna dair açıqlama veribmi, bilmirəm. Mən onu şəxsən tanımıram. Bu vəziyyət klub strukturu daxilində bəlkə onun mövqeyini gücləndirə bilər, amma mən onun adını belə dəqiq bilmirəm”.
Mourinyoya ödəniləcək təzminatın 15 milyon avro olduğu qeyd olunur.
çap et