Tayland məhkəməsi Baş nazir Paetongtarn Şinavatranı vəzifəsindən azad edib. Bu qərar, onun Kambocanın sabiq lideri Hun Senə “dayı” deyə müraciət etdiyi və mübahisəli telefon danışığı zamanı etik qaydaları pozduğu üçün verilib.
Güclü Şinavatra siyasi sülaləsinin üzvü olan Paetongtarn 2024-cü ilin avqustunda ölkənin ən gənc baş naziri seçilmişdi və bircə il vəzifədə qaldı. Tayland Konstitusiya Məhkəməsi 6-3 səs çoxluğu ilə verdiyi qərarda, Paetongtarnın Tayland konstitusiyasına uyğun keyfiyyətlərə malik olmadığını və qadağan olunmuş xüsusiyyətlərə sahib olduğunu bəyan edib.
15 iyun 2024-cü ildə baş vermiş və sızdırılmış telefon danışığında Paetongtarnın Kambocanın sabiq baş naziri Hun Senə “dayı” deyə müraciət etdiyi və Kamboca ordusunun sərhəd qarşıdurmasında öz ordusunu tənqid etdiyi eşidilib. Hun Senin “Bir şey istəyirsə, mənə deyər, həll edərəm” sözləri də telefon danışığında yer alıb. Bu mübahisəli ifadələr onun əleyhinə açılan məhkəmə işinin mərkəzində olub.
Məhkəmə həmçinin qeyd edib ki, Paetongtarnın telefon danışığında “sübut edilmiş dürüstlük və həqiqətə uyğunluqdan məhrum olduğu, etik standartları ciddi şəkildə pozduğu və ya onlara əməl etmədiyi” təsdiqlənib. Sızdırılmış səs yazısı Taylandda böyük etirazlara səbəb olub, müxalifət onu ölkənin milli maraqlarını təhlükəyə atmaqda ittiham edib.
5 günlük sərhəd qarşıdurması
Həftələr sonra Tayland və Kamboca arasında beş günlük sərhəd qarşıdurması baş verib. Hadisələrdə əsasən dinc sakin olmaqla ən az 38 nəfər həyatını itirib və yüz minlərlə insan evlərini tərk etmək məcburiyyətində qalıb.
Paetongtarn Tayland xalqından üzr istəyərək, sözlərinin gərginliyi azaltmaq üçün istifadə etdiyi bir danışıqlar texnikası olduğunu bildirib. Sabiq baş nazir məhkəmə qərarının açıqlanmasından sonra keçirdiyi mətbuat konfransında ölkəsinə təşəkkür edib.
çap et