Baş nazir Corcia Meloni (Giorgia Meloni) və müxalifət lideri də daxil olmaqla bir çox qadının fotoşəkilləri montajlanıb
İtaliya Baş naziri Corcia Meloni və Demokrat Partiyadan müxalifət lideri Elli Şlaynın (Elly Schlein) fotoşəkillərinin montajlanaraq pornoqrafik saytda yayımlanması müzakirələrə səbəb olub.
“Corriere della Sera”nın məlumatına görə, şəkillər “Phica” adlı internet saytının "VIP" bölməsində intim mesajlarla birlikdə yayımlanıb.
Sosial media üzərindən fotoşəkilləri götürülüb dəyişdirilən şəxslər arasında Meloninin bacısı Arianna Meloni, məşhur moda bloqeri Kiyara Ferranqi (Chiara Ferragni) və aktrisalar Paola Kortellesi (Paola Cortellesi) və Mara Venyer (Mara Venier) də yer alır.
Universitet və Tədqiqat Naziri Anna Mariya Bernini (Anna Maria Bernini) və Turizm Naziri Daniela Santançenin (Daniela Santanché) fotoşəkilləri də saytın VIP bölməsində yayımlanıb.
Bundan əlavə, “Müasirlər” (Noi Moderati) partiyasından Mara Karfanqa (Mara Carfagna) və Mariastella Celmini (Mariastella Gelmini), “Yaşasın İtaliya” (Italia Viva) partiyasından Maria Elena Boşki (Maria Elena Boschi) və “5 Ulduz Hərəkatı”ndan (M5S) Kiyara Appendinonun (Chiara Appendino) görüntüləri də saytda yer alıb.
Qadınların görüntülərinin müxtəlif mitinqlər və ya televiziya müsahibələri zamanı, həmçinin tətildə çəkilən fotoşəkillərdən ibarət olduğu bildirilib.
İtaliya Senatı sədri İqnazio La Russa hadisəni çox ciddi və qəzəb doğuran kimi qiymətləndirib.
Demokrat Partiyadan Valeriya Kampanya (Valeria Campagna) Phica saytı ilə bağlı hüquqi tədbir görülməsi üçün müraciət etdiklərini bildirib.
İtaliyada qadın düşmənliyi və cinsiyyətə əsaslanan zorakılıq müzakirələrini yenidən gündəmə gətirən bu skandal, “Meta”nın kişilərin həyat yoldaşları və ya tanımadıqları qadınların şəxsi fotoşəkillərini paylaşdıqları “Mia Moglie” (Qadın) adlı İtalyan “Facebook” hesabını bağlamasından bir həftə sonra ortaya çıxıb.
Corcia Meloni hadisəyə dair hələlik açıqlama verməyib.
çap et