Taylandın sərhədə yaxın Ban Nong Çan (Ban Nong Chan) kəndində “Kamboca-nın vətəndaş qarışıqlığı yaratmağa çalışdığı” iddiası ilə fövqəladə vəziyyət elan edilib.
Taylandın “The Nation” qəzetinə görə, iyul ayında Kamboca ilə sərhəd xəttində baş verən toqquşma və sonrasında əldə olunan atəşkəsdən sonra iki ölkə arasındakı gərginlik yenidən yüksəlməyə başlayıb.
Kamboca hökumətini sərhədə yaxın Ban Nong Çan kəndində “vətəndaş qarışıqlığı yaratmağa çalışmaq” ittihamı ilə suçlayan Tayland hökuməti, təhdidlərə qarşı kənddə fövqəladə vəziyyət elan edildiyini açıqlayıb.
Tayland ordusunun rəsmiləri kəndə hərbi birləşmələr, hüquq-mühafizə qüvvələri və mülki şəxslərdən ibarət sülh qüvvəsinin göndərilməsinə qərar verildiyini bildiriblər.
İki ölkə arasındakı sərhəd sazişinin pozulması səbəbindən mayın 28-də bölgədə qısa müddətli toqquşma yaşanmış və problemin sülh yolu ilə həllinə dair razılıq əldə edilmişdi.
Təxminən iki ay sonra, iyulun 24-də sərhəd xəttində baş verən toqquşmalarda hər iki ölkədən ümumilikdə 32 nəfər həyatını itirmişdi.
Malayziya Baş naziri Ənvər İbrahim (Anwar Ibrahim) iyulun 28-də görüşlərdən sonra tərəflərin “təxirəsalınmaz və şərtsiz” atəşkəsin tətbiqinə razılıq verdiyini açıqlamışdı.
çap et