ABŞ Prezidenti Donald Trampın siyasətlərinə qarşı Çin-Rusiya-Şimal Koreya ittifaqı dərinləşir. Bu gün üç ölkənin lideri Pekində bir araya gəlir.
Çin Prezidenti Si Cinpin, Rusiya və Şimal Koreya liderlərini Pekində görüşdürür.
Şimal Koreya lideri Kim Çen Inun xüsusi zirehli qatarı artıq Çinin paytaxtına çatıb. Rusiya Prezidenti Vladimir Putin isə Pekindəki Böyük Xalq Zalında keçirilən görüş zamanı Rusiyanın Çinlə münasibətlərini “misilsiz dərəcədə yüksək səviyyədə” adlandırıb. Putin, səmimi qarşılama üçün “əziz dostum” deyə müraciət etdiyi Si-yə təşəkkürünü bildirib.
Məlumata görə, sabah İran Prezidenti Məsud Pezeşkiyan da Çində keçiriləcək böyük hərbi paradda iştirak edəcək.
ABŞ Prezidenti Trampın ölkəni dünyadan təcrid etməyə çalışdığı və Qərb dövlətlərinin Rusiya ilə İrana ağır sanksiyalar tətbiq etdiyi bir vaxtda, Sinin liderləri bir araya gətirməsi Çinin Qərb əleyhdarı blokda artan diplomatik təsirini nümayiş etdirir.
Bu gün keçirilən üçtərəfli görüşdə Çin, Rusiya və Şimal Koreya arasında daha sıx müdafiə əlaqələri barədə mesaj verilməsi gözlənilir.
Si Cinpin dünən Şanxay Əməkdaşlıq Təşkilatının sammitindəki çıxışında belə demişdi: “Hegemoniya və güc siyasəti qarşısında açıq mövqe nümayiş etdirməyə davam etməliyik.”
Bugünkü danışıqlar zamanı Rusiya və Çin arasında enerji əməkdaşlığına dair mühüm sənəd imzalanıb. Belə ki, “Qazprom” və Çin Milli Neft Şirkəti 30 il müddətinə Çinə təbii qaz tədarükünü artıracaq yeni boru kəməri layihəsi üzrə razılıq əldə ediblər.
çap et