Qızıl, Federal Ehtiyat Sisteminin (FED) faiz endirimlərinə gedə biləcəyi gözləntilərini gücləndirə biləcək ABŞ məşğulluq hesabatı öncəsi bir unsiya üçün 3 542 dollar civarında ticarət olunub.
Dəyərli metal, çərşənbə günü açıqlanan zəif iş elanları göstəricisinin bazarları sentyabrda faiz endiriminin demək olar tamamilə qiymətləndirilməsinə yönəltməsindən sonra 3 578,51 dollarlıq rekord səviyyədən geri çəkilib.
İnvestorlar indi cümə günü açıqlanacaq və pandemiyadan bəri ABŞ-da ən zəif məşğulluq artımı dövrünü uzadacağı gözlənilən qeyri-kənd təsərrüfatı məşğulluq hesabatına diqqət ayırıb. Bu, əmək bazarının yumşaldığına dair siqnallara əlavə olunacaq. Cümə axşamı yayımlanan göstəricilər də işsizlik müavinəti müraciətlərinin iyundan bəri ən yüksək həddə çatdığını və xəzinə istiqrazlarının gəlirliliyinin son ayların minimumuna gerilədiyini göstərib.
Son üç ildə qızıl və gümüşün dəyəri iki dəfədən çox artıb. Geopolitik risklər, iqtisadi qeyri-müəyyənliklər və qlobal ticarətdəki problemlər təhlükəsiz liman tələbinin güclənməsinə səbəb olub. ABŞ prezidenti Donald Trampın bu il FED-ə artan tənqidləri isə qurumun müstəqilliyinə dair narahatlıqları artırıb. Tramp qısa müddət ərzində FED-də “çoxluğu ələ keçirəcəyini” və faizləri azaldacağını bildirmişdi.
Bununla belə, Trampın FED İdarə Heyətinə namizəd göstərdiyi Stiven Miranın dünən Senatdakı təsdiq dinləməsində mərkəzi bankın əsas vəzifəsinin “böhranları və hiperinflyasiyanı önləmək” olduğunu vurğulaması müəyyən narahatlıqları yumşaldıb. Miran, Ağ Evdəki vəzifəsini davam etdirəcəyini etiraf etsə də, Fed-in müstəqilliyinə sadiq olduğunu bir daha təsdiqləyib.
çap et