Hindistan Mərkəzi Bankı (Reserve Bank of India – RBI), ABŞ Xəzinədarlıq istiqrazlarına yatırımlarını azaldıb. Bankın ABŞ istiqrazlarındakı yatırımı may ayında 235,3 milyard dollar olduğu halda, iyunda 227,4 milyard dollara düşüb. Ötən ilin eyni dövründə RBI-nin istiqrazlarda yatırımı 242 milyard dollar səviyyəsində idi.
Hindistan maliyyə naziri Nirmala Sitaraman ötən həftə RBI-nin ehtiyatları şaxələndirmək üçün çox diqqətlə verilmiş bir qərar aldığını vurğulayıb.
Hazırda Hindistanın ehtiyatları təxminən 694 milyard dollar təşkil edir və bu məbləğ dünyada dördüncü ən böyük ehtiyat sayılır.
“IndusInd Bank Ltd.” baş iqtisadçısı Qaurav Kapur bildirib ki, ABŞ-ın 2022-ci ildə Ukraynanın işğalından sonra Rusiyaya tətbiq etdiyi sanksiyalar və yaranan geosiyasi gərginliklər mərkəzi bankların qərarlarında rol oynayır. Onun sözlərinə görə, hər bir mərkəzi bank yatırımlarını şaxələndirmək istəyir.
RBI bazar ertəsi rəsmi tətil səbəbindən bağlı olub və şərh tələbinə cavab verməyib.
RBI iyul ayı etibarilə qızıl ehtiyatlarını ötən ilin eyni dövründəki 841,5 tondan təxminən 880 tona yüksəldib.
RBI-nin sabiq sədr müavini Maykl Patra ötən ay qələmə aldığı köşə yazısında mərkəzi bankların böhran vəziyyətlərində xaricdəki qızıl ehtiyatlarına çıxış imkanları ilə bağlı narahatlıqları olduğunu qeyd edib. O, RBI-nin bu addımının həmçinin ehtiyatları şaxələndirmək və ABŞ dollarına asılılığı azaltmaq üçün strateji bir cəhd olduğunu bildirib.
çap et