Dünya şöhrətli pop-ulduz Maykl Ceksonun həyatından bəhs edən “Michael” bioqrafik film hələ ekranlara çıxmadan mübahisələrin mərkəzinə çevrilib. Bu dəfə mübahisələri alovlandıran isə “Popun Kralı” ləqəbli məşhur müğənninin qızı Paris Cekson olub.
Cekson filmə heç bir töhfəsinin olmadığını vurğulayaraq layihədən tamamilə uzaq durduğunu bildirib və ekran işinin atasının hekayəsini olduğundan daha müsbət göstərərək həqiqəti təhrif etdiyini irəli sürüb.
“Bu mənim sirkim deyil”
Filmin aktyorlarından Kolman Dominqonun “Paris və qardaşı Prins layihəni dəstəkləyir” sözlərinə “Instagram”dan cavab verən Paris Cekson nə çəkiliş meydanına getdiyini, nə də yaradıcı prosesdə iştirak etdiyini açıq şəkildə bildirib: “Bu layihəyə heç bir töhfəm yoxdur. “Setdə kömək etdi” deməyi dayandırsınlar, bu, həqiqətən də qəribədir”.
Cekson ssenarinin ilk variantını oxuduğunu, oradakı səmimiyyətsiz yerləri qeyd etdiyini, lakin onların nəzərə alınmadığını deyib. Layihədən bu səbəbdən çəkildiyini vurğulayaraq, “Bu mənim meymunlarım deyil, mənim sirkim deyil” sözləri ilə filmə bağının qalmadığını açıqlayıb.
“Fanat fantaziyasına xidmət edən bir qurğu”
Paris Ceksonun ən sərt tənqidi filmin gerçəyi əks etdirmək əvəzinə tamaşaçının eşitmək istədiyi xəyali bir tablo təqdim etməsi ilə bağlı olub. Onun fikrincə film “hələ də xəyal dünyasında yaşayan” fanatları məmnun etməyə çalışır və atasının həyatının “şirinləşdirilmiş” bir versiyasını təqdim edir.
Parisin “şirinləşdirilmiş” ifadəsi Hollivud bioqrafiyalarında həqiqətin cilalanaraq əfsanəyə çevrilməsi mübahisəsini yenidən gündəmə gətirib.
2019-cu ildən hazırlanma mərhələsində olan “Michael” prodüser Qraham Kinq ilə Maykl Ceksonun mirasını idarə edən Con Branka və Con Makkleynin əməkdaşlığı ilə çəkilir. Rejissor kürsüsündə Antuan Fuqua əyləşib, baş rolda isə Mayklın qardaşı oğlu Cafar Cekson çıxış edir. Heyətdə həmçinin Mayls Teller, Nia Lonq və Ket Qraham yer alır.
Film əvvəlcə 2025-ci ilin aprel ayına, sonra isə oktyabrına planlaşdırılsa da, hüquqi proseslər və yenidən çəkilişlər səbəbilə nümayiş tarixi son olaraq 24 aprel 2026-cı ilə təxirə salınıb.
Bioqrafik filmlər ətrafında mübahisə yenidən qızışdı
Paris Ceksonun çıxışı fanatların bir ulduz bioqrafiyasından gözləntiləri ilə reallıq arasındakı gərginliyi ortaya qoyur. Tamaşaçının emosional gözləntilərini önə çəkən parıldadılmış hekayələrlə sənədli ciddiyyəti daşıyan xatirələr arasındakı fərq bioqrafik ekran işlərində köhnə sualı yenidən gündəmə gətirir: Vacib olan nədir – təsirli bir hekayə, yoxsa həqiqətin özü?
Paris Ceksonun cavabı isə aydındır: “Bizim ehtiyacımız olan romantik bir əfsanə deyil, üzləşməkdən çəkinməyən gerçək bir hekayədir”.
çap et