Polis bu gün elan edib ki, Danimarkanın ən böyük hərbi bazası üzərində kimliyi məlum olmayan iki pilotsuz uçuş aparatı (PUA) uçub. Bu, Danimarkalı rəsmi şəxslərin “hibrid hücum” adlandırdığı son hadisədir.
Polis məmuru Simon Skljaer AFP-yə verdiyi açıqlamada, “Dünən saat 20:15 radələrində bir neçə saat davam edən hadisəni qeyd etdiyimizi təsdiqləyə bilərəm. Hərbi bazanın ətrafında və üzərində bir və ya iki PUA görüldü”, – deyib.
Polis PUA-ların mənşəyi barədə şərh verməyib və vurğulayıb ki, “biz onları vurmadıq”.
Danimarka NATO-nun 4-cü maddəsi çərçivəsində müttəfiqləri ilə məsləhətləşməyə indilikdə ehtiyac görmədiyini açıqlayıb. Bunun səbəbi ölkənin bir çox hava limanlarında dəfələrlə PUA-ların müşahidə edilməsidir.
NATO-nun 4-cü maddəsinə əsasən, bir üzv dövlət xaricdən təhdid altında hiss etdikdə, müttəfiqlər arasında məsləhətləşmə aparılmalıdır. Məlumata görə, Polşa bir neçə PUA-nın hava sahəsini pozmasından sonra, Estoniya isə Rusiya döyüş təyyarələrinin hava sahəsini pozmasından sonra bu maddəni tətbiq edib.
Sentyabrın 22-də bir neçə iri PUA-nın görünməsi Kopenhagen hava limanının bir neçə saatlıq tam bağlanmasına səbəb olub. Ondan bir gün sonra isə qərbdəki digər hava limanlarında gecə boyu PUA-lar təkrar görünüb və bu, Aalborq hava limanının hava sahəsinin bağlanmasına gətirib çıxarıb. Hadisələrin arxasında kimin dayandığı hələ məlum deyil.
çap et